Memleket basshysynyń áleýmettik mańyzy bar infraqurylymdy damytý jónindegi tapsyrmalaryn oryndaý sheńberinde Arnaýly memlekettik qordan Batys Qazaqstan oblysynda sýmen jabdyqtaý júielerin salý jáne rekonstrýktsiialaý boiynsha 11 jobany júzege asyrýǵa 5,5 mlrd teńge bólindi,- dep habarlaidy Dalanews.kz
Úkimet 4,3 mlrd teńge kólemindegi qarjylandyrýdyń negizgi somasy 9 nysanǵa bólinetinin habarlady.
1,8 mlrd teńge 1,7 myńnan astam turǵyny bar Qaratóbe aýdanynyń Tólen, Sáýle jáne Qaraqamys eldi mekenderine jańa tarmaq salý arqyly sýmen jabdyqtaýdyń magistraldy júielerin salýǵa, 2,5 mlrd teńge Terekti, Qaratóbe aýdandarynyń 8 aýylynda, sondai-aq Báiterek aýdanynda sýmen jabdyqtaý jelilerin salýǵa baǵyttaldy.
"Sondai-aq buryn Báiterek aýdany Kirsanov aýylynyń turǵyndaryn sýmen qamtamasyz etýge jáne Jánibek aýdanyndaǵy Ýrdin toptyq sý qubyryn qaita jańartýǵa 1,2 mlrd teńge baǵyttalady. Búgingi tańda jumys 60% oryndaldy", - delingen habarlamada.
Atalǵan jumys Memleket basshysynyń halyqty sapaly aýyz sýmen 100% qamtamasyz etý jónindegi tapsyrmasyn júzege asyrýǵa baǵyttalǵan.
Ónerkásip jáne qurylys ministrliginiń derekteri boiynsha, Batys Qazaqstan oblysyndaǵy aǵymdaǵy qoljetimdilik deńgeii qalalarda 100%-dy, al aýyldyq eldi mekenderde 97%-dy quraidy. Búgingi tańda Arnaýly memlekettik qordan 400-den astam áleýmettik mańyzy bar jobany salýǵa 375 mlrd teńge baǵyttaldy. Mektepter, aýrýhanalar, sport keshenderi, sýmen jabdyqtaý nysandary jáne basqa da nysandar salynýda. Qazirdiń ózinde 44 nysan aiaqtalyp, el igiligine berildi.
