"Qaırat" – "Real Madrıd" machynan Almaty búdjetine qansha tabys túsedi

Kámshat Tileýhan 29 qyr. 2025 12:42

Týrızm jáne sport mınıstrliginiń Týrızm ındýstrıasy komıtetiniń tóraǵasy Nurtas Káripbaev búgin OKQ-da ótken brıfıń barysynda Almatyda ótetin "Qaırat" – "Real Madrıd" machyna qansha týrıs keletinin jáne búdjetke qansha túsim túsýi múmkin ekenin aıtty, dep habarlaıdy Dalanews.kz.

Ol bul rette bıletterdiń barlyǵy satylyp ketkenin eske saldy.

"Almatyda týrıserdi qabyldaýǵa barlyq jaǵdaı jasalǵan. "Qaırat" – "Real Madrıd" machy 4 myńnan astam týrıserdi tartyp, búdjetimizdi shamamen 2-3 mlrd teńgemen tolyqtyrady dep kútiledi", - deıdi Nurtas Káripbaev.

Ol Almatynyń ınfraqurylymy tolyǵymen daıyn ekenin atap ótti, óıtkeni qala buǵan deıin Djennıfer Lopes pen Backstreet Boys syndy álemdik juldyzdardyń konsertterin ótkizgen.

Aıta ketsek, 29 qyrkúıekte túnde Almatyǵa Kılıan Mbappe, Vınısıýs Jýnıor jáne Djýd Bellıngem syndy fýtbol áleminiń juldyzdary bar "Real-Madrıd" komandasy kelip jetti. Olar besjuldyzdy InterContinental Almaty qonaqúıine ornalasty. Keıbir BAQ 277 bólmeden turatyn 15 qabatty qonaqúıdi sheteldik klýb bútindeı jalǵa alǵany týraly aqparatty da usynýda.

Chempıondar lıgasynyń jalpy kezeńiniń ekinshi týryndaǵy "Qaırat" – "Real Madrıd" machy 30 qyrkúıekte Almatyda ótedi.

Buǵan deıin atalǵan machqa bılet satyp alǵan keıbir qazaqstandyqtar ony qaıta sata bastaǵanyn jazǵanbyz. Orynǵa qaraı qaıta satylyp jatqan bılet quny 100 myńnan 700 myń teńge aralyǵyn qamtıdy. Al bılettiń naqty quny 30 myńnan bastalyp 250 myń teńge bolady.