Almatylyq «Qairat» «Seltikti» jeńip, Chempiondar ligasynyń negizgi kezeńine joldama aldy, dep habarlaidy Dalanews.kz.
26 tamyzda Almatydaǵy «Ortalyq» stadionda almatylyq «Qairat» pen Shotlandiianyń Glazgo qalasynan kelgen «Seltik» arasyndaǵy jaýapty match ótti.
Kezdesý Chempiondar ligasynyń plei-off irikteý kezeńiniń aiasynda uiymdastyryldy. Alǵashqy match 0:0 esebimen aiaqtalǵan.
Alǵashqy qaýipti sát 24-minýtta boldy. «Qairat» oiynshylary ortalyq alańda dopty ilip áketip, alǵa pas shyǵardy. Dopty almatylyqtardyń shabýylshysy Rikardino qabyldap, qorǵaýshylardy ainalyp ótip, dat qaqpashysy Kasper Shmeihelden asyra tebýdi oilady. Alaida Shmeihel dopty ýaqytyly sekirip qaǵyp, shabýyldy toqtatty. Onyń ústine, braziliialyq oiynshy ofsaidta bolǵany anyqtaldy.
Arada bir-aq minýt ótkende «Seltik» qaýipti shabýyl uiymdastyrdy. Sol qaptaldan kelgen áýelete pas Djeims Forrestiń basyna jetti. Ol áýedegi dopqa birinshi bolyp jetip, qaqpaǵa baǵyttady. Biraq qazaqstandyq qaqpashy Temirlan Anarbekov ádemi sekirip, dopty qaitardy.
Birinshi taim eki taraptyń belsendi oiynyna qaramastan, aiqyn basymdyqsyz ótti. Alǵashqy 45 minýt 0:0 esebimen jabyldy.
Ekinshi taim qyzyq oqiǵamen bastaldy. «Seltik» qaqpashysy Kasper Shmeihel óz oiynshysynan kelgen pasqa aiyp alańynda qolmen oinap qoidy. Arbitr qaqpa mańynan erkin soqqy belgiledi.
Bul múmkindikti portýgaldyq shabýylshy Jorjino paidalanyp kórdi. Ol dopty ortaǵa qarai bura tepkenimen, «Seltik» qorǵaýshylary tosqaýyl qoia bildi.
63-minýttan keiin oiyn birqatar aýysymdarmen jalǵasty. Aldymen «Qairat» oiynshy aýystyrdy: jaraqat alǵan izraildik jartylai qorǵaýshy Den Gleizerdiń ornyna 22 jastaǵy qazaqstandyq Damir Qasabýlat shyqty.
Arada jeti minýt ótkende «Seltik» qos birdei oiynshysyn almastyrdy. Djeims Forrest pen Ian Hion-dziýn alańnan ketip, ornyna belgiialyq Arne Engels pen irlandiialyq shabýylshy Adam Aida shyqty. Taǵy tórt minýttan keiin shotlandtar qorǵaýshy Kiran Tirnidi Dein Miýrreige almastyrdy. Osy sátten soń almatylyqtar jas shabýylshy – 18 jastaǵy Ramazan Baǵdatty alańǵa shyǵardy. Ol Rikardinonyń ornyn basty.
86-minýtta japondyq vinger Daidzen Maeda búkil stadiondy dúr silkindirdi. Ol alańdy boilai júgirip ótip, Anarbekovpen betpe-bet shyqty. Biraq soqqysy qaqpadan sál biik ketti.
Osy sátten keiin «Qairat» qarsy shabýyl uiymdastyrdy. Izraildik qorǵaýshy Ofri Arad baspen qaqpaǵa soqqy baǵyttaǵanymen, Shmeihel tamasha reaktsiia tanytyp, qaýipti seiiltti.
Negizgi ýaqyt 0:0 esebimen aiaqtaldy.
Qosymsha ýaqyttyń alǵashqy jartysynda esep ózgergen joq. Ekinshi qosymsha taim aldynda «Seltik» taǵy aýysym jasady: Entoni Ralstonnyń ornyna Kolbi Donovan shyqsa, Reo Hatate ornyna Liýk Makkovan shyqty.
Sońǵy minýttarda shotlandtar almatylyqtarǵa tynys bermei, birneshe qaýipti shabýyl jasady. Biraq Temirlan Anarbekov bárine tótep berip, qaqpasyn «qurǵaq» saqtap qaldy.
Matchtyń aiaqtalýyna tórt minýt qalǵanda «Qairat» Erkin Tapalovty Serbiiadan kelgen Iýga Stanoevqa almastyrdy. Al eki minýttan soń Lýish Matýdyń ornyna qazaqstandyq Oljas Baibek shyqty.
Degenmen bul ózgerister nátijege áser etpedi. Esep ashylmai, oiyn penalti seriiasyna ulasty.
Penalti seriiasy. «Qairat» – «Seltik»
«Qairat»:
Valerii Gromyko – múlt ketti;
Aleksandr Martynovich – gol;
Ofri Arad – gol;
Egor Sorokin – gol.
«Seltik»:
Adam Aida – múlt ketti;
Liýk Makkovan – múlt ketti;
Arne Engels – gol;
Kallým Makgregor – gol;
Daidzen Maeda – múlt ketti.
Osylaisha, almatylyq «Qairat» Temirlan Anarbekovtiń úsh seiviniń jáne komanda soqqan úsh goldyń arqasynda penaltide 3:2 esebimen jeńiske jetti. Klýb tarihynda alǵash ret Chempiondar ligasynyń negizgi kezeńine joldama aldy.
