الماتىلىق «قايرات» «سەلتيكتى» جەڭىپ، چەمپيوندار ليگاسىنىڭ نەگىزگى كەزەڭىنە جولداما الدى، دەپ حابارلايدى Dalanews.kz.
26 تامىزدا الماتىداعى «ورتالىق» ستاديوندا الماتىلىق «قايرات» پەن شوتلانديانىڭ گلازگو قالاسىنان كەلگەن «سەلتيك» اراسىنداعى جاۋاپتى ماچ ءوتتى.
كەزدەسۋ چەمپيوندار ليگاسىنىڭ پلەي-وفف ىرىكتەۋ كەزەڭىنىڭ اياسىندا ۇيىمداستىرىلدى. العاشقى ماچ 0:0 ەسەبىمەن اياقتالعان.
العاشقى ءقاۋىپتى ءسات 24-مينۋتتا بولدى. «قايرات» ويىنشىلارى ورتالىق الاڭدا دوپتى ءىلىپ اكەتىپ، العا پاس شىعاردى. دوپتى الماتىلىقتاردىڭ شابۋىلشىسى ريكاردينو قابىلداپ، قورعاۋشىلاردى اينالىپ ءوتىپ، دات قاقپاشىسى كاسپەر شمەيحەلدەن اسىرا تەبۋدى ويلادى. الايدا شمەيحەل دوپتى ۋاقىتىلى سەكىرىپ قاعىپ، شابۋىلدى توقتاتتى. ونىڭ ۇستىنە، برازيليالىق ويىنشى وفسايدتا بولعانى انىقتالدى.
ارادا ءبىر-اق مينۋت وتكەندە «سەلتيك» ءقاۋىپتى شابۋىل ۇيىمداستىردى. سول قاپتالدان كەلگەن اۋەلەتە پاس دجەيمس فوررەستىڭ باسىنا جەتتى. ول اۋەدەگى دوپقا ءبىرىنشى بولىپ جەتىپ، قاقپاعا باعىتتادى. ءبىراق قازاقستاندىق قاقپاشى تەمىرلان اناربەكوۆ ادەمى سەكىرىپ، دوپتى قايتاردى.
ءبىرىنشى تايم ەكى تاراپتىڭ بەلسەندى ويىنىنا قاراماستان، ايقىن باسىمدىقسىز ءوتتى. العاشقى 45 مينۋت 0:0 ەسەبىمەن جابىلدى.
ەكىنشى تايم قىزىق وقيعامەن باستالدى. «سەلتيك» قاقپاشىسى كاسپەر شمەيحەل ءوز ويىنشىسىنان كەلگەن پاسقا ايىپ الاڭىندا قولمەن ويناپ قويدى. اربيتر قاقپا ماڭىنان ەركىن سوققى بەلگىلەدى.
بۇل مۇمكىندىكتى پورتۋگالدىق شابۋىلشى جورجينو پايدالانىپ كوردى. ول دوپتى ورتاعا قاراي بۇرا تەپكەنىمەن، «سەلتيك» قورعاۋشىلارى توسقاۋىل قويا ءبىلدى.
63-مينۋتتان كەيىن ويىن ءبىرقاتار اۋىسىمدارمەن جالعاستى. الدىمەن «قايرات» ويىنشى اۋىستىردى: جاراقات العان يزرايلدىك جارتىلاي قورعاۋشى دەن گلەيزەردىڭ ورنىنا 22 جاستاعى قازاقستاندىق دامير قاسابۋلات شىقتى.
ارادا جەتى مينۋت وتكەندە «سەلتيك» قوس بىردەي ويىنشىسىن الماستىردى. دجەيمس فوررەست پەن يان ءحون-دزيۋن الاڭنان كەتىپ، ورنىنا بەلگيالىق ارنە ەنگەلس پەن يرلانديالىق شابۋىلشى ادام ايدا شىقتى. تاعى ءتورت مينۋتتان كەيىن شوتلاندتار قورعاۋشى كيران ءتيرنيدى دەين ميۋررەيگە الماستىردى. وسى ساتتەن سوڭ الماتىلىقتار جاس شابۋىلشى – 18 جاستاعى رامازان باعداتتى الاڭعا شىعاردى. ول ريكاردينونىڭ ورنىن باستى.
86-مينۋتتا جاپوندىق ۆينگەر دايدزەن ماەدا بۇكىل ستاديوندى ءدۇر سىلكىندىردى. ول الاڭدى بويلاي جۇگىرىپ ءوتىپ، اناربەكوۆپەن بەتپە-بەت شىقتى. ءبىراق سوققىسى قاقپادان ءسال بيىك كەتتى.
وسى ساتتەن كەيىن «قايرات» قارسى شابۋىل ۇيىمداستىردى. يزرايلدىك قورعاۋشى وفري اراد باسپەن قاقپاعا سوققى باعىتتاعانىمەن، شمەيحەل تاماشا رەاكسيا تانىتىپ، ءقاۋىپتى سەيىلتتى.
نەگىزگى ۋاقىت 0:0 ەسەبىمەن اياقتالدى.
قوسىمشا ۋاقىتتىڭ العاشقى جارتىسىندا ەسەپ وزگەرگەن جوق. ەكىنشى قوسىمشا تايم الدىندا «سەلتيك» تاعى اۋىسىم جاسادى: ەنتوني رالستوننىڭ ورنىنا كولبي دونوۆان شىقسا، رەو حاتاتە ورنىنا ليۋك ماككوۆان شىقتى.
سوڭعى مينۋتتاردا شوتلاندتار الماتىلىقتارعا تىنىس بەرمەي، بىرنەشە ءقاۋىپتى شابۋىل جاسادى. ءبىراق تەمىرلان اناربەكوۆ بارىنە توتەپ بەرىپ، قاقپاسىن «قۇرعاق» ساقتاپ قالدى.
ماچتىڭ اياقتالۋىنا ءتورت مينۋت قالعاندا «قايرات» ەركىن تاپالوۆتى سەربيادان كەلگەن يۋگا ستانويەۆقا الماستىردى. ال ەكى مينۋتتان سوڭ لۋيش ماتۋدىڭ ورنىنا قازاقستاندىق ولجاس بايبەك شىقتى.
دەگەنمەن بۇل وزگەرىستەر ناتيجەگە اسەر ەتپەدى. ەسەپ اشىلماي، ويىن پەنالتي سەرياسىنا ۇلاستى.
پەنالتي سەرياسى. «قايرات» – «سەلتيك»
«قايرات»:
ۆالەريي گرومىكو – ءمۇلت كەتتى؛
الەكساندر مارتىنوۆيچ – گول؛
وفري اراد – گول؛
ەگور سوروكين – گول.
«سەلتيك»:
ادام ايدا – ءمۇلت كەتتى؛
ليۋك ماككوۆان – ءمۇلت كەتتى؛
ارنە ەنگەلس – گول؛
كاللۋم ماكگرەگور – گول؛
دايدزەن ماەدا – ءمۇلت كەتتى.
وسىلايشا، الماتىلىق «قايرات» تەمىرلان اناربەكوۆتىڭ ءۇش سەيۆىنىڭ جانە كوماندا سوققان ءۇش گولدىڭ ارقاسىندا پەنالتيدە 3:2 ەسەبىمەن جەڭىسكە جەتتى. كلۋب تاريحىندا العاش رەت چەمپيوندار ليگاسىنىڭ نەگىزگى كەزەڭىنە جولداما الدى.
