Qazaqstandyq kásipker Qairat Boranbaev “Qairat” fýtbol klýbynyń Chempiondar ligasynyń negizgi kezeńine alǵash ret shyǵýyn el sporty úshin erekshe oqiǵa dep atady, dep habarlaidy Dalanews.kz.
"Biz soǵan jettik. Bul – jyldar boiy atqarǵan eńbegimizdiń nátijesi. Qazaqstan fýtboly Chempiondar ligasynyń ánurany shyrqalatyn deńgeige kóterile alatynyn dáleldedik. Bizdiń komanda osyndai aýqymdaǵy oiyndardy baiyppen, minezben jáne abyroimen ótkizip, jeńiske jete alady", – dedi ol.
Boranbaevtyń aitýynsha, bul jetistik akademiiadaǵy, infraqurylymdaǵy jáne jastardy qoldaýdaǵy júieli jumystyń uzaq merzimdi jemisi.
"Daiyn sheshimdi syrttan izdeýdiń qajeti joq. Eger el ishinde óz komandańdy, tárbielenýshilerińdi, oiynyń stilin jáne mádenietin damyta alsań – nátije ózdiginen keledi. Bul – kún saiyn jumys istep júrgen júzdegen jannyń eńbegi: jattyqtyrýshylar, dárigerler, analitikter, ákimshiler, oiynshylar. Bul – senimniń, qajyr-qairattyń, kúrdeli sheshimderdiń jemisi. Biz muny jankúierler úshin, qala úshin, el úshin jasadyq. Óitkeni Qazaqstannyń fýtbol áleýeti zor. Eýropanyń alyp klýbtary Almatyǵa kelýi tiis. Jigitterdiń óz fýtbol armany bolýy úshin, Qazaqstandy shyn súiip qana qoimai, maqtan etetin komanda bolýy úshin", – dedi kásipker.
Eske salsaq, keshe “Qairat” alǵash ret Chempiondar ligasynyń negizgi kezeńine joldama aldy. Rafael Ýrazbahtin baptaityn almatylyq komanda plei-offta Shotlandiianyń 55 dúrkin chempiony “Seltikti” jeńip, tarihi jeńiske jetti.
Osylaisha, “Qairat” Chempiondar ligasynyń toptyq kezeńine shyqqan ekinshi qazaqstandyq klýb atandy.
