Mýzyka – kúlli adamzatqa ortaq. Eń áserli, siqyrly sulý saz sózsiz-aq áser ete alady. Al bul mýzyka óneri qamkóńil jandarǵa baǵyttalsa, jaǵymdy qasieti eselenip keteri anyq. Jambyl atyndaǵy filarmoniianyń bul maqsattaǵy dástúrge ainalǵan igi is-sharalarynyń biri – qaiyrymdylyq kontsertteri.
Respýblikalyq Naýryz merekesine arnalǵan onkúndik sheńberinde 15 naýryz – qaiyrymdylyq kúninde filarmoniia ónerpazdary «Júrek jylýy» atty kóshpendi kontsert uiymdastyrdy. Túske deiin Oblystyq arnaýly áleýmettik qyzmetterdi qajet etetin balalardy qoldaý ortalyǵyna bardy. Is-sharany filarmoniianyń uiymdastyrý bóliminiń basshysy Sabyrjan Nesipbai mán-mańyzyn arttyra otyryp júrgizdi.
Filarmoniia ánshileri, QR Mádeniet qairatkeri Erjan Álimbetov, Mádeniet salasynyń úzdigi Maqpal Qazybekqyzy, halyqaralyq baiqaýlardyń laýreattary Birjan Báziljan, Janqoja Aiapov, N.Tilendiev atyndaǵy memlekettik akademiialyq folklorly – etnografiialyq «Otyrar sazy» orkestriniń solisteri Áshimhan Nurǵali, Tursyn Arsen balalarǵa ánnen shashý shashyp, qýanysh syilady.
Sahnadan kórip júrgen ártisteri ózderi kelip, óner kórsetýi balalar úshin este qalar jarqyn sáttiń biri boldy. Balalar kózinen baqyttyń ushqynyn kórgen ártister de shabyttanyp, ánderin júrekten júrekke jetkize shyrqady. Balalardy bir-birine qamqor, janashyr bolýǵa shaqyrdy.
Osy quram tústen keiin «Tsentr domashnei zaboty» ortalyǵyna bardy. Qazir sharý tartqan qariialarymyz bir kezderi eli, halqy, keleshek urpaǵy úshin eńbek etken. Sol qariialarymyzdy qurmetteý, syilaý qasieti Jambyl atyndaǵy filarmoniianyń dástúrge ainalǵan igi is-sharasynyń biri desek artyq aitpaimyz.
Filarmoniia ánshileri súiikti ánderimen qarttardyń kóńilin kóterip, etken eńbekteri úshin alǵys bildirdi. Erekshe iltipatqa riza bolǵan qariialar kózderine jas ala otyryp riiasyz rizashylyqtaryn bildirip, aq batalaryn berip shyǵaryp saldy.
Merýert Máýletqyzy,
jýrnalist
