Qazirgi tańda taǵy Besqaraǵaı aýdanynda 11 aýyldyq okrýgke qaýip tónip otyr.
Búgin SHQO ákimi Danıal Ahmetov sý resýrstaryn paıdalanýdy retteý jáne qorǵaý jónindegi Ertis baseındik ınspeksıasy ýaqtyly monıtorıń júrgizbegenin málimdedi.
Budan bólek, orta táýliktik sý jiberý mólsherin kóterý máselesi ne oblystyq, ne qalalyq ákimdikpen kelisilmegen. Aıta ketý kerek, atalǵan fakt boıynsha prokýratýra tekserýdi bastady.
Aımaq basshysynyń tóraǵalyǵymen ótken jınalysta Ertis baseındik ınspeksıasynyń basshysy Qazymbek Baımaǵambetov 28-inshi naýryz kúni sý daǵdarystyq deńgeıde jiberilgenin rastady.
– Osy jerde aıtylǵan sandar, rasymen-aq, biz istegen jumystyń nátıjesi. Másele 23-26-shy naýryz aralyǵynda aýa raıy qolaısyzdyq týǵyzyp, arty jańbyrǵa ulasqan qar jaýǵan keıin týyndady. Jan-jaqtan keletin aǵystar kóbeıdi. Shúlbi SES joǵary jaǵyndaǵy kórsetkish 239 74 jetti, – dedi ol.
Danıal Ahmetov úsh ese artyq kólemde sý jiberý týraly sheshimdi jergilikti atqarýshy organmen kelisýdi jón kórmegen ınspeksıa óz isine salǵyrt qaraǵan dep basa aıtty.
Osylaısha, júzdegen adamnyń ómirine qaýip tóndirgen-di.
– Úsh táýlik boıy bizge túsiniksiz jaǵdaıda óte úlken mólshermen sý jiberilip jatyr. Eger naýryzdyń biri Shúlbi sý qoımasyndaǵy orta shyǵyn sekýndyna 501 m3 qurasa, 20-naýryzda sekýndyna 661 m3-qa jetip, orta esepten kóterildi. 25 naýryzda sý jiberý deńgeıi sekýndyna 721 m3 qurady.
Al naýryzdyń 27-nde sekýndyna birden 1127 m3 kóterilgen, 28-nen bastap apattyq deńgeıdegi sý jiberý faktisi tirkelip, kórsetkish sekýndyna 1800 m3 jetti. Bul aı kóleminde josparly sý jiberý jumysy júrmegendigin kórsetedi, – dep, málimdedi aımaq ákimi.
– Sý qoımasy taýdyń eteginde ornalassa, túsiner edim. Sý eshqaıda ketpeı, sonda baryp aǵady dep. Biraq, ol jazyq aýmaqta ornalasqan.
Naýryzdyń 11-nen eki kún boıy tolassyz jańbyr jaýyp, kún raıy jylynǵanyn bilesizder. Sol kezden bastap nege sý jiberilmedi?!
Aıta ketý kerek, ádette daǵdarys deńgeıi 450 sm quraıtyn Semeıdegi Ertis ózeniniń sýy túnde eń joǵary - 525 santımetrge jetti. Túıemoınaq aralyndaǵy 192 adam evakýasıalandy.
Olardyń 139-y, onyń ishinde 40 bala qonaqúıge ornalastyryldy. Úsh ýaqyt tamaqpen jáne barlyq qajettiliktermen qamtyldy.
Búginde atalmysh fakti boıynsha jáne tótenshe jaǵdaı jarıalanǵan aýdandarda prokýratýra tekserý jumystaryn bastap ketken.
– Sekýndyna 1800 m3 sý jiberý týraly naqty fakti, onyń saldary da bar. Biz túbegeıli atalǵan jaǵdaıdy tekseretin bolamyz. Naýryzdyń 7-si kúni qalalar men aýdandar ákimderiniń, ókiletti organ ókilderiniń qatysýymen jınalys ótkizip, búgingideı jaǵdaı bolmas úshin qatań baqylaý men taldaýǵa alýdy tapsyrǵanbyz.
Prokýratýra naqty, sýbektıvti sebepter men adamı faktordyń bar-joǵyn anyqtaýdy mejege alady. Qazirgi ýaqytta TJ bolǵan aýdandarda tekserý júrgizýdemiz, - dedi oblys prokýrory Qusaıyn Igembaev.
Sondaı-aq, kesheli beri Besqaraǵaı aýdanynda kúsheıtilgen rejım engizilgen. Sý kirý qaýpi bar 11 eldi meken belgili. Olar: Staraıa krepost Steklánka, Glýhovka, Birlik jáne Belokamenka. Aýdandyq ákimdik qyzmetkerleri úı-úıdi aralap, evakýasıa bolǵan jaǵdaıda jınalý oryndary týraly habar taratty.
Turǵyndardyń maldaryna ýaqytsha pana berý úshin sharýa qojalyqtar da qol ushyn sozyp, kómekke kelýde.
Azamattyq qorǵanys pen TJ qyzmetteri ákimderdiń basshylyǵymen qaýipti aımaqtarda jumys isteýde. Semeıde arnaıy komısıa qurylyp, alǵashqy tolqynnyń saldaryn esepteýde.
SHQO ákiminiń baspasóz qyzmeti
https://www.facebook.com/kenzhegazindudi/videos/955474047948491/
https://dalanews.kz/35025
