قازىرگى تاڭدا تاعى بەسقاراعاي اۋدانىندا 11 اۋىلدىق وكرۋگكە ءقاۋىپ ءتونىپ وتىر.
بۇگىن شقو اكىمى دانيال احمەتوۆ سۋ رەسۋرستارىن پايدالانۋدى رەتتەۋ جانە قورعاۋ جونىندەگى ەرتىس باسسەيندىك ينسپەكسياسى ۋاقتىلى مونيتورينگ جۇرگىزبەگەنىن مالىمدەدى.
بۇدان بولەك، ورتا تاۋلىكتىك سۋ جىبەرۋ مولشەرىن كوتەرۋ ماسەلەسى نە وبلىستىق، نە قالالىق اكىمدىكپەن كەلىسىلمەگەن. ايتا كەتۋ كەرەك، اتالعان فاكت بويىنشا پروكۋراتۋرا تەكسەرۋدى باستادى.
ايماق باسشىسىنىڭ توراعالىعىمەن وتكەن جينالىستا ەرتىس باسسەيندىك ينسپەكسياسىنىڭ باسشىسى قازىمبەك بايماعامبەتوۆ 28ء-ىنشى ناۋرىز كۇنى سۋ داعدارىستىق دەڭگەيدە جىبەرىلگەنىن راستادى.
– وسى جەردە ايتىلعان ساندار، راسىمەن-اق، ءبىز ىستەگەن جۇمىستىڭ ناتيجەسى. ماسەلە 23-26-شى ناۋرىز ارالىعىندا اۋا رايى قولايسىزدىق تۋعىزىپ، ارتى جاڭبىرعا ۇلاسقان قار جاۋعان كەيىن تۋىندادى. جان-جاقتان كەلەتىن اعىستار كوبەيدى. ءشۇلبى سەس جوعارى جاعىنداعى كورسەتكىش 239 74 جەتتى، – دەدى ول.
دانيال احمەتوۆ ءۇش ەسە ارتىق كولەمدە سۋ جىبەرۋ تۋرالى شەشىمدى جەرگىلىكتى اتقارۋشى ورگانمەن كەلىسۋدى ءجون كورمەگەن ينسپەكسيا ءوز ىسىنە سالعىرت قاراعان دەپ باسا ايتتى.
وسىلايشا، جۇزدەگەن ادامنىڭ ومىرىنە ءقاۋىپ توندىرگەن-دى.
– ءۇش تاۋلىك بويى بىزگە تۇسىنىكسىز جاعدايدا وتە ۇلكەن مولشەرمەن سۋ جىبەرىلىپ جاتىر. ەگەر ناۋرىزدىڭ ءبىرى ءشۇلبى سۋ قويماسىنداعى ورتا شىعىن سەكۋندىنا 501 م3 قۇراسا، 20-ناۋرىزدا سەكۋندىنا 661 م3-قا جەتىپ، ورتا ەسەپتەن كوتەرىلدى. 25 ناۋرىزدا سۋ جىبەرۋ دەڭگەيى سەكۋندىنا 721 م3 قۇرادى.
ال ناۋرىزدىڭ 27-ندە سەكۋندىنا بىردەن 1127 م3 كوتەرىلگەن، 28-نەن باستاپ اپاتتىق دەڭگەيدەگى سۋ جىبەرۋ فاكتىسى تىركەلىپ، كورسەتكىش سەكۋندىنا 1800 م3 جەتتى. بۇل اي كولەمىندە جوسپارلى سۋ جىبەرۋ جۇمىسى جۇرمەگەندىگىن كورسەتەدى، – دەپ، مالىمدەدى ايماق اكىمى.
– سۋ قويماسى تاۋدىڭ ەتەگىندە ورنالاسسا، تۇسىنەر ەدىم. سۋ ەشقايدا كەتپەي، سوندا بارىپ اعادى دەپ. ءبىراق، ول جازىق اۋماقتا ورنالاسقان.
ناۋرىزدىڭ 11-نەن ەكى كۇن بويى تولاسسىز جاڭبىر جاۋىپ، كۇن رايى جىلىنعانىن بىلەسىزدەر. سول كەزدەن باستاپ نەگە سۋ جىبەرىلمەدى؟!
ايتا كەتۋ كەرەك، ادەتتە داعدارىس دەڭگەيى 450 سم قۇرايتىن سەمەيدەگى ەرتىس وزەنىنىڭ سۋى تۇندە ەڭ جوعارى - 525 سانتيمەترگە جەتتى. تۇيەمويناق ارالىنداعى 192 ادام ەۆاكۋاسيالاندى.
ولاردىڭ 139-ى، ونىڭ ىشىندە 40 بالا قوناقۇيگە ورنالاستىرىلدى. ءۇش ۋاقىت تاماقپەن جانە بارلىق قاجەتتىلىكتەرمەن قامتىلدى.
بۇگىندە اتالمىش فاكتى بويىنشا جانە توتەنشە جاعداي جاريالانعان اۋدانداردا پروكۋراتۋرا تەكسەرۋ جۇمىستارىن باستاپ كەتكەن.
– سەكۋندىنا 1800 م3 سۋ جىبەرۋ تۋرالى ناقتى فاكتى، ونىڭ سالدارى دا بار. ءبىز تۇبەگەيلى اتالعان جاعدايدى تەكسەرەتىن بولامىز. ناۋرىزدىڭ 7ء-سى كۇنى قالالار مەن اۋداندار اكىمدەرىنىڭ، وكىلەتتى ورگان وكىلدەرىنىڭ قاتىسۋىمەن جينالىس وتكىزىپ، بۇگىنگىدەي جاعداي بولماس ءۇشىن قاتاڭ باقىلاۋ مەن تالداۋعا الۋدى تاپسىرعانبىز.
پروكۋراتۋرا ناقتى، سۋبەكتيۆتى سەبەپتەر مەن ادامي فاكتوردىڭ بار-جوعىن انىقتاۋدى مەجەگە الادى. قازىرگى ۋاقىتتا تج بولعان اۋدانداردا تەكسەرۋ جۇرگىزۋدەمىز، - دەدى وبلىس پروكۋرورى قۇسايىن يگەمبايەۆ.
سونداي-اق، كەشەلى بەرى بەسقاراعاي اۋدانىندا كۇشەيتىلگەن رەجيم ەنگىزىلگەن. سۋ كىرۋ ءقاۋپى بار 11 ەلدى مەكەن بەلگىلى. ولار: ستارايا كرەپوست، ستەكليانكا، گلۋحوۆكا، بىرلىك جانە بەلوكامەنكا. اۋداندىق اكىمدىك قىزمەتكەرلەرى ءۇي-ۇيدى ارالاپ، ەۆاكۋاسيا بولعان جاعدايدا جينالۋ ورىندارى تۋرالى حابار تاراتتى.
تۇرعىنداردىڭ مالدارىنا ۋاقىتشا پانا بەرۋ ءۇشىن شارۋا قوجالىقتار دا قول ۇشىن سوزىپ، كومەككە كەلۋدە.
ازاماتتىق قورعانىس پەن تج قىزمەتتەرى اكىمدەردىڭ باسشىلىعىمەن ءقاۋىپتى ايماقتاردا جۇمىس ىستەۋدە. سەمەيدە ارنايى كوميسسيا قۇرىلىپ، العاشقى تولقىننىڭ سالدارىن ەسەپتەۋدە.
شقو اكىمىنىڭ باسپا ءسوز قىزمەتى
https://www.facebook.com/kenzhegazindudi/videos/955474047948491/
https://dalanews.kz/35025
