Jańa jyldan bastap memlekettik satyp alý týraly zańǵa engizilgen ózgerister kúshine endi. Aqmola oblysynyń ákimi Marat Ahmetjanovtyń aitýynsha, endi qurylys jumystaryna arnalǵan konkýrstyq rásimder reitingilik-balldyq júie arqyly ótkiziledi. Buryn merdiger eń tómen baǵa usynǵan kompaniia bolyp sanalsa, qazir jeńimpaz avtomatty túrde anyqtalady. Iaǵni, adami faktor tolyǵymen alynyp tastalǵan,- dep habarlaidy Dalanews.kz
— Jańa júieniń bir artyqshylyǵy — konkýrs nátijesi endi shaǵymdanýǵa jatpaidy. Bul jobalardy júzege asyrýǵa oń áser etedi, — dedi óńir basshysy.
Portal jergilikti kompaniialarǵa artyqshylyq berý úshin qosymsha ball taǵaiyndaidy. Sondai-aq, materialdyq jáne eńbek resýrstarynyń bolýy, tájiribe jáne ózge de kriteriiler eskeriledi. Konkýrs ótkizý merzimi de qysqartylǵan.
Eger 2022 jyly jergilikti merdigerlermen kelisimsharttardyń nebári 18,5%-y jasalǵan bolsa, biyl bul kórsetkish 87%-ǵa jetken. Nátijesinde, oblys biýdjetine túsken salyq kólemi ótken jylmen salystyrǵanda 80 mlrd teńgege artqan.
— Jergilikti biznes qanshalyqty jaqsy jumys istese, soǵurlym óńirge salyq kóp túsedi. Sonymen qatar, olar jergilikti turǵyndardy jumyspen qamtidy. Bul – qosymsha jumys oryndary men halyq tabysynyń artýy, — dep atap ótti Marat Ahmetjanov.
Buryn jii jeńip shyǵatyn basqa óńirlerdiń merdigerleri tehnikalyq múmkindikteri men jumys kúshi bolmaǵandyqtan, jobalardy sýbmerdigerge berip, qarjyny alyp, kete baratyn. Bul jaǵdai uzaqqa sozylǵan qurylys pen jobanyń qymbattaýyna ákeletin.
— Eki jyldan beri men barlyq qurylysty túzetýsiz aiaqtaý týraly tapsyrma berip kelemin. Maǵan kimniń salyp jatqany mańyzdy emes, nátije kerek. Búginde jyldam ári sapaly jumys istegisi keletin adamdar kóbeidi, — dedi ákim.
Buryn az kólemdegi jobalar birneshe jylǵa sozylatyn. Qazir mundai jobalar tolyqtai bir jylǵa shoǵyrlandyrylǵan. Bul merdigerlerge asyra paida tabýǵa jol bermeidi.
— Buryn jobanyń eki-úsh jylǵa sozylatynyn aitsaq, olar birden kelesi jyly qansha paiyz qymbattaitynyn esepteitin. Al qazir biz bir jyl ishinde júzege asyrýdy talap etemiz. Qatań baqylaý bar, talap joǵary. Sol sebepti burynǵydai “paida qýyp” keletinder azaidy, — dedi oblys basshysy.
Óńirde ótken jyly 28 úi, al biyl taǵy 12 úi paidalanýǵa berilgen. Kelesi jylǵa ótetin 20-ǵa jýyq úi bar. Eki jyl ishinde bastalǵan barlyq jobalardy aiaqtap, jańa júiege tolyq kóshý josparlanǵan.
— Bilim berý nysandary boiynsha 2021 jyly aiaqtalýy tiis bolǵan tórt mekteptiń qurylysy biyl aiaqtalady. Bul – Bulandy, Petrovka, Jańajol jáne Bestóbe aýyldaryndaǵy mektepter. Biylǵy oqý jyly osy jańa mektepterde bastalady. Sebepteri ártúrli bolǵanymen, eń bastysy – sabaq alýymyz kerek, — dedi Marat Ahmetjanov.
Degenmen, óńirde áli de aiaqtalmaǵan jobalar bar. Bul tek qurylys nysandary emes, sonymen qatar jylý, sýmen jabdyqtaý infraqurylymdaryna da qatysty. Atalǵan jobalar boiynsha sot protsesteri júrip jatyr.
