Premer-ministr, sý tasqynyna qarsy is-sharalardy úilestirý jáne sý tasqyny zardaptaryn joiý jónindegi respýblikalyq shtabtyń jetekshisi Oljas Bektenov Aqtóbe oblysyndaǵy sý tasqynyna bailanysty jaǵdaidy tekserip, memleket basshysynyń tapsyrmalarynyń oryndalý barysymen tanysty, dep habarlaidy Dalanews.kz.
Bektenov birqatar sý qoimalaryn tikushaqpen aralap, sý tasqynynan zardap shekken úilerge bardy, sondai-aq ahýaldyq ortalyqtyń jumysymen tanysyp, respýblikalyq shtabtyń otyrysyn ótkizdi.
Oljas Bektenov sý basqan úilerdiń jai-kúiin qarap, turǵyndardyń baspanalaryn qalpyna keltirý jáne qosymsha qoldaý sharalaryn atady. Ákimdik tizimderi boiynsha sý tasqynynan zardap shekkenderge 3 aiǵa nesie tólemderin avtomatty túrde keiinge shegerý múmkindigi beriledi, tólemderdi keshiktirgeni úshin aiyppuldar men ósimpuldar salynbaidy.
“Oblysta tasqyn qaýpi áli seiilmegen. Qazir ózenderdiń kópshiliginde sý arnasynan asyp ketkeli tur. Óńirde 792 úi sý astynda qaldy. Oblystyń 5 aýdanynda (Qobda, Muǵaljar, Temir, Áiteke bi, Oiyl) jáne Aqtóbe qalasynda jergilikti aýqymdaǵy tabiǵi sipattaǵy tótenshe jaǵdai jariialandy. Sý tasqynyna qarsy is-sharalarǵa jeke quramnan 3140 adam, 664 tehnika jumyldyryldy. Barlyǵy 8 978 adam qaýipsiz jerge kóshirildi, – delingen premer-ministrdiń habarlamasynda.
Premer-ministr kólemi 15,8 mln m3 Maǵajan bógetin aralady. Bóget 1985 jyly paidalanýǵa berilgen, gidrotehnikalyq qurylys jekemenshik "Tulpar" JShS kompaniiasynyń ieliginde. Qyzyltý aýylynan 25 adam, Tabantal qystaǵynan 11 adam evakýatsiialandy.
Boljamdarǵa sáikes, 5-11 sáýirde oblystyń barlyq aýmaǵynda kún jylynýy múmkin. Osyǵan bailanysty sý tasqynynan zardap shekken aýyldarmen qatar, qaita sý alyp ketý qaýpi joq aimaqtardaǵy eldi mekenderdiń tynys-tirshiligin de qalpyna keltirýge nazar aýdaryldy.
“Qazir 26 eldi mekende elektr qýatymen jabdyqtaý qalpyna keltirildi. "Energojúie" JShS-niń barlyq bólimsheleri kúsheitilgen rejimde jumys istep jatyr. Respýblikalyq mańyzy bar 9, oblystyq mańyzy bar 3 jolda jáne 9 aýdandyq mańyzy bar jolda sýdyń toqtaýyna bailanysty kólik qozǵalysyna qoiylǵan shekteýler alynyp tastaldy. Óńirde shyǵyndy óteý komissiiasy jumys isteidi. Úsh kún ishinde komissiiaǵa materialdyq shyǵyndardy óteý týraly 1623 ótinish túsken”, – dep málimdedi preser-ministr.
TJ oryn alǵan kúnnen bastap kúntizbelik 30 kún ishinde keltirilgen shyǵyndy óteý týraly jergilikti ákimdikterge ótinish beriledi. Sonymen qatar Aqtóbe oblysynda sý tasqynynan zardap shekken jáne qiyn jaǵdaiǵa tap bolǵan turǵyndar ákimdikke tiisti ótinishpen júginý arqyly bir rettik tólem ala alady.
Qorytyndy boiynsha úkimet basshysy Oljas Bektenov sý tasqyny saldaryn joiǵannan keiin kommýnaldyq jáne jeke menshiktegi gidrotehnikalyq qurylystarda jan-jaqty tekserýler júrgizýdi tapsyrdy. Aqtóbe oblysynda barlyǵy 206 gidrotehnikalyq qurylys bar.
