Aitysker aqyn Muhamedjan Tazabek jýrnalist Janar Baisemizdiń YouTube arnasyna bergen suhbatynda Qazaqstannyń tuńǵysh prezidenti Nursultan Nazarbaevqa qatysty pikir bildirdi, dep habarlaidy dalanews.kz.
Aqynnyń aitýynsha, onyń kózqarasy naqty bir tulǵaǵa emes, jalpy bilik júiesindegi qundylyqtar men basqarý mádenietine baǵyttalǵan.
"Meniń kózqarasym jeke tulǵalarǵa – Nazarbaevqa, Toqaevqa nemese basqa bilik basyndaǵylarǵa emes, jalpy biliktiń qundylyqtaryna bailanysty", – dedi ol.
Tazabek "Tuńǵysh prezident" uǵymyn otbasyndaǵy tuńǵysh balamen salystyrdy. Onyń sózinshe, otbasynda tuńǵysh balaǵa erekshe úmit artylatyny siiaqty, eldiń alǵashqy prezidentine de keń múmkindik pen airyqsha ókilettik berilgen.
Aqynnyń paiymynsha, sol kezeńde bilik bir ortalyqqa shoǵyrlanyp, mańyzdy sheshimder kóbine bir júieniń ainalasynda qabyldanǵan. Degenmen ol ótken dáýirdegi qatelikterdi tek bir adamnyń atymen bailanystyrý ádiletti emes dep sanaidy.
"Nazarbaevtyń ózi de kadr máselesinde de, basqa sheshimderde de qatelikter bolǵanyn moiyndaǵan. Keńestik tapshylyqtan keiin halyq molshylyqqa umtyldy. Bul bir adamnyń ǵana áreketi emes, tutas qoǵamnyń talpynysy edi", – dedi Muhamedjan Tazabek.
Onyń aitýynsha, 90-jyldar men ótpeli kezeńde qoǵamda árkim óz múddesin kúittegen jaǵdailar kóp boldy. Keibir yqpaldy azamattar men sheneýnikter memleket múlkine jeke menshigindei qaraǵan.
Tazabek bilik júiesindegi kemshilikterdi túsiný úshin jeke tulǵalardy ǵana emes, sol ortany qalyptastyrǵan qoǵamdyq sana men qundylyqtardy da saralaý qajet ekenin aitty.
"Qatelikterdi bir adamǵa ǵana tańý durys emes. Patshanyń janyndaǵylar da sol ortany qalyptastyrady. Tómen oilaityndar adamdardy talqylaidy, ortasha oilaityndar oqiǵalardy sóz etedi, al joǵary oilaityndar qundylyqtardy saralaidy deidi. Sondyqtan men barynsha qundylyq turǵysynan oilaýǵa tyrysamyn", – dedi aqyn.
Osylaisha Muhamedjan Tazabek Nazarbaev kezeńine baǵa bergende emotsiiaǵa emes, sol dáýirdegi qoǵamdyq ahýal men bilik mádenietine nazar aýdarý kerek degen oi aitty.
