"Qazir el ishinde túrli jaǵymsyz áńgimeler tarap jatqanyn bilemin. Osyǵan bailanysty Memleket basshysy retinde taǵy da qaitalap aitamyn. Tuńǵysh Prezidentimiz elimizdi irgesi berik memleketke ainaldyrý úshin zor eńbek sińirdi. Kemshilik jibergen kezi bolsa, onyń eldiń keiingi basshylary tarazyǵa tartatyn bolady", – dedi Q. Toqaev.
Onyń atap ótkenindei AQSh, Singapýr, Qytai sekildi irgeli memleketter kósemderiniń el basqarǵan jyldaǵy jetistikterin kemshiliginen joǵary qoia bilgen.
"Jańylmaityn jaq, súrinbeitin tuiaq joq! Jumys istemei, qol qýsyryp otyrǵan adam ǵana qatelespeidi. Amerika prezidentteri de, Qytai kósemderi de qatelesken. Olar da kóp kemshilik jiberdi. Tipti eldiń bári jaqtap, maqtap sóileitin Singapýr kóshbasshysy Li Kýan Iu-da qatelik jibergen", – dedi Toqaev.
Onyń pikirinshe Qazaqstan halqy Tuńǵysh prezidenttiń tarihi rólin umytpaýy kerek. Onyń qairatkerlik qabiletine ádil baǵa berilýi tiis. Ótkenin qaralaityn halyq, bolashaqtyń qadirin bilmeidi.
"Ótken zamandy joqqa shyǵaratyn, óz basshylaryna shabýyl jasaityn halyqtyń bolashaǵy ekitalai ári bulyńǵyr", – dedi Prezident.
Ol sonymen qatar Nazarbaevtyń iadrolyq qarýsyzdaný baǵytynda úlken is atqaryp, álemdik qaýymdastyq tarapynan abyroi-bedelge ie bolǵanyn atap ótti. Ótken 30 jylda Qazaqstan Orta Aziia elderinen ozyp, aimaqtyń kóshbasshysy atanǵan.
Toqaev sondai-aq el astanasyna qatysty pikir bildirip, onyń Saryarqa tórine ornalasýy geosaiasi turǵyda kóregen sheshim bolǵanyn atap ótti.
"90-shy jyldary Qazaqstanǵa qastyq oilaǵan keibir sarapshylar bizdiń eldi kóp uzamai tarap tynady degen boljam aitty. Nursultan Nazarbaev sol bir aýmaly-tókpeli shaqta memlekettiń qabyrǵasyn qalaýdy moinyna aldy", – dedi Toqaev.
Onyń atap ótkenindei 90-shy jyldardyń ortasynda bastalǵan shekarany shegendeý jumysy oidaǵydai oryndalǵan. Strategiialyq mánge ie osy bir jetistiktiń arqasynda Qazaqstan memleket retinde ósip-óne bastaǵan.
Sondai-aq memleket basshysy eldi aýyz birlikke shaqyrdy.
"Biz buǵan deiingi jetistikterimizden aiyrylyp qalmaýymyz kerek. Memleketimizdi nyǵaityp, kez-kelgen synaqqa daiyn bolýymyz qajet. Tabysqa jetý úshin, eń aldymen, aýyzbirshilik kerek ekenin este ustaiyq", – dedi Memleket basshysy.
