Búgin «Ónerli ólke» oblystyq óner festivali aiasynda Otyrar aýdanynyń mádeniet kúnderi bastaldy. Sharaǵa aýdannyń týmasy, álem aqyny, Qazaqstannyń Eńbek eri Muhtar Shahanov arnaiy qonaq bolyp, rizashylyǵyn bildirdi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aldymen «Kieli Otyrardan – qasietti Túrkistanǵa» atty rýhani kerýen kóshi keldi. Uly kóshte álemge áigili ǵulama Ábý Nasyr ál-Farabi, kúsh atasy – Qajymuqan, etnograf Ózbekáli Jánibekov, Táýshen Ábýova, Muhtar Shahanov, Áselhan Qalybekova, Shámshi Qaldaiaqov syndy tulǵalar beinesi somdalǵan. Birtýar azamattar bastaǵan kóshtiń qatarynda Otyrardyń ánshi-kúishi, jyrshy ónerpaz jastaryda bar.
QR Sýretshiler odaǵynyń múshesi, aýdannyń Qurmetti azamaty – Ádilhan Máliktiń týyndylarynan kórkemsýret kórmesi qala turǵyndary men qonaqtarynyń nazaryna usynyldy. Sonymen qatar, aýdannyń jetistikteri men kitap kórmesi jasaqtalǵan.
Otyrarlyq qolóner sheberleriniń, aǵash ustalarynyń jáne qumyra jasaýshylardyń kórmesi aiasynda sheberlik saǵattary ótip jatyr. Aýyl sharýashylyǵy ónimderiniń kórmesi jármeńkege ulasyp, «Uly dala dástúri» aidarymen kiiz úilerde halqymyzdyń ádet-ǵuryp, salt-dástúrlerinen kórinister kórsetildi.
«Saiyn dalanyń sal-serileri» sazdy kompozitsiiasy usynylyp, «Syrly kese» biimen sahna shymyldyǵy ashyldy. «Otyrar – ónerli orda» atty Óner jáne saz mektebi, Baltakól aýyldyq «Dástúr» ájeler ansambli ónerpazdarynyń kontserttik baǵdarlamasy usynyldy. Kópshilikke bie, túie saýyp kórsetildi. «Botany qyrqynan shyǵarý», kiiz basý, qurt jaiý men mai pisý, taǵy basqa umyt bolyp bara jatqan ulttyq qundylyqtar ulyqtaldy. «Altybaqan» jastar oiyn-saýyǵy ótti.
Al keshki saǵat 18:00-de «Kerýen sarai» kesheninde elimizge belgili ónerpazdardyń qatysýymen «Ónerli ólke – Túrkistan» atty aýdan ónerpazdarynyń gala kontserti ótedi. Kesh qonaqtary – satira sardarlary Ýálibek Ábdiraiymov pen Júsip Aqshora, «Altyn dombyra» iegeri Bekarys Shoibekov pen aitys aqtańgeri Anar Japparqulova jáne án óneriniń juldyzdary Hadisha Shalabaeva, Berik Seksenbek, Ermahan Áshirov. Keshti belgili jýrnalist Qaiyrhan Máýlen men Gúlimqulja Seitqazy júrgizedi.
Aita keteiik, mádeniet kúnderi erteń de jalǵasady. 5 qazan kúni saǵat 10:00-den bastap Etnoaýylda qolóner buiymdary men sýret kórmeleri, 11:00-de kóshe teatry qoiylymdary kópshilik nazaryna usynylady. «Ulttyq oiyn – ulttyń igiligi» aidarymen ulttyq sport oiyndary túrlerinen saiys ótkiziledi. Qala turǵyndary men qonaqtary sharada ónerpazdardyń óneri men ulttyq qundylyqtarymyzdyjańǵyrýyna kýá bolyp, rýhani sýsyndap qaita alady.
