Shymkent qalasy ákiminiń orynbasary Rýslan Berdenovke qarýly shabýyl jasalǵannan keiin, onyń atqaryp kelgen qyzmettik mindetteri ýaqytsha túrde ákimniń birinshi orynbasary Qýanysh Asylovqa júkteldi, dep habarlaidy Dalanews.kz.
Berdenov qaladaǵy qurylys, sáýlet, jer qatynastary men qala qurylysy salalaryn qadaǵalap kelgen. Endi bul baǵyttarǵa bailanysty ákimshilik jumystardy Qýanysh Asylov júrgizedi.
Asylov bul laýazymǵa 2023 jyldyń qańtar aiynda taǵaiyndalǵan. Buǵan deiin ol QR Prezidenti Ákimshiliginde memlekettik inspektor retinde qyzmet atqarǵan.
Eske sala keteiik, 21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
"Shymkent qalasy ákiminiń orynbasary oq jaraqatymen qalalyq aýrýhanaǵa tústi. Oǵan shuǵyl operatsiia jasaldy. Operatsiia barysynda qan ketý toqtatyldy, zaqym qalpyna keltirildi. Ómirine qaýip joq", - dep jazylǵan habarlamada.
Málimetke súiensek, onyń jaǵdaiy turaqty aýyr dep baǵalanady. Sheneýnik dárigerlerdiń turaqty baqylaýynda jáne qajet meditsinalyq kómekti alyp jatyr.
