شىمكەنت قالاسى اكىمىنىڭ ورىنباسارى رۋسلان بەردەنوۆكە قارۋلى شابۋىل جاسالعاننان كەيىن، ونىڭ اتقارىپ كەلگەن قىزمەتتىك مىندەتتەرى ۋاقىتشا تۇردە اكىمنىڭ ءبىرىنشى ورىنباسارى قۋانىش اسىلوۆقا جۇكتەلدى، دەپ حابارلايدى Dalanews.kz.
بەردەنوۆ قالاداعى قۇرىلىس، ساۋلەت، جەر قاتىناستارى مەن قالا قۇرىلىسى سالالارىن قاداعالاپ كەلگەن. ەندى بۇل باعىتتارعا بايلانىستى اكىمشىلىك جۇمىستاردى قۋانىش اسىلوۆ جۇرگىزەدى.
اسىلوۆ بۇل لاۋازىمعا 2023 جىلدىڭ قاڭتار ايىندا تاعايىندالعان. بۇعان دەيىن ول ق ر پرەزيدەنتى اكىمشىلىگىندە مەملەكەتتىك ينسپەكتور رەتىندە قىزمەت اتقارعان.
ەسكە سالا كەتەيىك، 21 ساۋىردە شىمكەنت قالاسى اكىمدىگى عيماراتى ماڭىندا اتىس بولدى. سالدارىنان رۋسلان بەردەنوۆ جاراقات الدى. پوليسيا مالىمەتىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالعان، بۇل دەرەك بويىنشا قىلمىستىق ءىس قوزعالعان.
ال دەنساۋلىق ساقتاۋ مينيسترلىگى مالىمەتىنشە، رۋسلان بەردەنوۆكە وپەراسيا جاسالعان، ومىرىنە ءقاۋىپ جوق.
"شىمكەنت قالاسى اكىمىنىڭ ورىنباسارى وق جاراقاتىمەن قالالىق اۋرۋحاناعا ءتۇستى. وعان شۇعىل وپەراسيا جاسالدى. وپەراسيا بارىسىندا قان كەتۋ توقتاتىلدى، زاقىم قالپىنا كەلتىرىلدى. ومىرىنە ءقاۋىپ جوق"، - دەپ جازىلعان حابارلامادا.
مالىمەتكە سۇيەنسەك، ونىڭ جاعدايى تۇراقتى اۋىر دەپ باعالانادى. شەنەۋنىك دارىگەرلەردىڭ تۇراقتى باقىلاۋىندا جانە قاجەت مەديسينالىق كومەكتى الىپ جاتىر.
