Qazaqstanda zamanaýi qarý-jaraq pen áskeri tehnika óndirisin uiymdastyrýǵa nietti otandyq investor jobany bastai almai áýrege túsken. Onyń basty sebebi Indýstriia jáne qurylys ministrliginiń negizsiz biýrokratiiaǵa jol berýi. Bul týraly Bas prokýratýra málimdedi, dep habarlaidy Dalanews.kz.
Quzyrly organnyń dereginshe, ministrlik investitsiialyq kelisimdi qaraýǵa arnalǵan komissiiany zańda belgilengen 15 jumys kúni ishinde qurýy kerek bolǵan. Biraq bul is 47 kúnge sozylyp ketken. Sonymen qatar salalyq qorytyndy shyǵarý da 9 jumys kúnine keshiktirilgen. Jobanyń jalpy qaralý merzimderi de zańda kórsetilgen ýaqyttan asyp ketken.
Atalǵan zańbuzýshylyqtar úshin Indýstriia jáne qurylys ministrliginiń departament direktory tártiptik jaýapkershilikke tartyldy.
“Prokýrorlar elimizdiń investitsiialyq tartymdylyǵyn arttyrýǵa, sondai-aq investorlardyń quqyqtary men zańdy múddelerin qorǵaýǵa basa mán berip otyr. Búginge deiin 1 352 investordyń 801 problemalyq máselesi sheshildi. Bul baǵyttaǵy jumys Bas prokýratýra basshylyǵynyń erekshe baqylaýynda”, – delingen resmi habarlamada.
Aita keteiik, Qazaqstan biyl táýelsizdik jyldarynda alǵash ret investitsiia tartý boiynsha aimaqtaǵy kóshbasshylyq ornynan aiyrylǵan bolatyn. Sarapshylardyń pikirinshe, buǵan memlekettik organdardyń júieli biýrokratiiasy men negizsiz qaǵazbastylyǵy sebep bolyp otyr.
