Qarjy vitse-ministri Erjan Birjanov 2026 jyldan bastap qosymsha qun salyǵy 16%-ǵa ósken jaǵdaida elimizde qandai taýarlar qymbattaýy múmkin ekenin aitty, dep habarlaidy Dalanews.kz.
Qarjy vitse-ministriniń aitýynsha,2026 jyly qosymsha qun salyǵy 16%-ǵa ósken jaǵdaida, eń aldymen import taýarlardyń baǵasy ósedi.
"Eger taýarlar shetelden ákelinetin bolsa, onda olar qymbattaidy. Iaǵni, import taýarlar. Óitkeni osyǵan deiin mundai taýarlarǵa 12 paiyz qosymsha qun salyǵy salynsa, endi ol 2026 jyldan bastap 16 paiyzǵa artady. Iaǵni, olardyń baǵasy 4 paiyzǵa ulǵaiatyn bolady", - deidi vitse-ministr.
Aýylsharýashylyǵy ónimderiniń baǵasy óspeýi kerek. Nege?
Onyń aitýynsha, máselen aýylsharýashylyǵy salasynyń ónimderi qymbattamaýy múmkin.
"Sebebi, jańa ózgeristerge sáikes, bul saladaǵy qosymsha qun salyǵy boiynsha jeńildik 80 paiyzdy quraidy. Degenmen lizingke shetelden ákelingen tehnikalar, taǵy sol sekildi importpen bailanysty faktorlar boiynsha bul arada janama túrde qymbatshylyq áseri baryn da joqqa shyǵara almaimyz", - deidi ol.
Baspana baǵasy qymbattai ma?
Erjan Birjanovtyń pikirinshe, qurylys salasy buǵan deiin ózderine berilgen jeńildikti utymdy paidalana almaǵan.
"Jańadan salynatyn turǵyn úilerge qatysty jeńildikter qarastyrylǵan bolatyn, sóitip olar buǵan deiin QQS-tan bosatylǵan. Biraq, ózderińiz kórip otyrǵandaryńyzdai, bul saladaǵy kompaniialar atalǵan jeńildikti baǵany túsirýge baǵyttamady. Iaǵni, jeńildik bar-joǵyna qaramastan bizde baǵany naryq aiqyndap jatty. Sondyqtan úkimet Salyq kodeksine osy baǵytta jańa ózgerister engizýdi qarastyryp jatyr", - deidi ol.
Buǵan deiin Májilis jańa Salyq kodeksi jobasyn ekinshi oqylymda qabyldap, ony qaraý úshin Senatqa joldaǵanyn habarlaǵanbyz.
