قارجى ۆيسە-مينيسترى ەرجان ءبىرجانوۆ 2026 جىلدان باستاپ قوسىمشا قۇن سالىعى 16%-عا وسكەن جاعدايدا ەلىمىزدە قانداي تاۋارلار قىمباتتاۋى مۇمكىن ەكەنىن ايتتى، دەپ حابارلايدى Dalanews.kz.
قارجى ۆيسە-مينيسترىنىڭ ايتۋىنشا،2026 جىلى قوسىمشا قۇن سالىعى 16%-عا وسكەن جاعدايدا، ەڭ الدىمەن يمپورت تاۋارلاردىڭ باعاسى وسەدى.
"ەگەر تاۋارلار شەتەلدەن اكەلىنەتىن بولسا، وندا ولار قىمباتتايدى. ياعني، يمپورت تاۋارلار. ويتكەنى وسىعان دەيىن مۇنداي تاۋارلارعا 12 پايىز قوسىمشا قۇن سالىعى سالىنسا، ەندى ول 2026 جىلدان باستاپ 16 پايىزعا ارتادى. ياعني، ولاردىڭ باعاسى 4 پايىزعا ۇلعاياتىن بولادى"، - دەيدى ۆيسە-مينيستر.
اۋىلشارۋاشىلىعى ونىمدەرىنىڭ باعاسى وسپەۋى كەرەك. نەگە؟
ونىڭ ايتۋىنشا، ماسەلەن اۋىلشارۋاشىلىعى سالاسىنىڭ ونىمدەرى قىمباتتاماۋى مۇمكىن.
"سەبەبى، جاڭا وزگەرىستەرگە سايكەس، بۇل سالاداعى قوسىمشا قۇن سالىعى بويىنشا جەڭىلدىك 80 پايىزدى قۇرايدى. دەگەنمەن ليزينگكە شەتەلدەن اكەلىنگەن تەحنيكالار، تاعى سول سەكىلدى يمپورتپەن بايلانىستى فاكتورلار بويىنشا بۇل ارادا جاناما تۇردە قىمباتشىلىق اسەرى بارىن دا جوققا شىعارا المايمىز"، - دەيدى ول.
باسپانا باعاسى قىمباتتاي ما؟
ەرجان ءبىرجانوۆتىڭ پىكىرىنشە، قۇرىلىس سالاسى بۇعان دەيىن وزدەرىنە بەرىلگەن جەڭىلدىكتى ۇتىمدى پايدالانا الماعان.
"جاڭادان سالىناتىن تۇرعىن ۇيلەرگە قاتىستى جەڭىلدىكتەر قاراستىرىلعان بولاتىن، ءسويتىپ ولار بۇعان دەيىن ققس-تان بوساتىلعان. ءبىراق، وزدەرىڭىز كورىپ وتىرعاندارىڭىزداي، بۇل سالاداعى كومپانيالار اتالعان جەڭىلدىكتى باعانى تۇسىرۋگە باعىتتامادى. ياعني، جەڭىلدىك بار-جوعىنا قاراماستان بىزدە باعانى نارىق ايقىنداپ جاتتى. سوندىقتان ۇكىمەت سالىق كودەكسىنە وسى باعىتتا جاڭا وزگەرىستەر ەنگىزۋدى قاراستىرىپ جاتىر"، - دەيدى ول.
بۇعان دەيىن ءماجىلىس جاڭا سالىق كودەكسى جوباسىن ەكىنشى وقىلىمدا قابىلداپ، ونى قاراۋ ءۇشىن سەناتقا جولداعانىن حابارلاعانبىز.
