قازاقستاندا "ۇلتتىق قور - بالالارعا" باعدارلاماسى اياسىندا كەيٸنگٸ ٷش جىلدا بالالاردىڭ شوتىنا 2,5 ملرد دوللاردان اسا قاراجات جينالعان. باعدارلاما پرەزيدەنت قاسىم-جومارت توقاەۆتىڭ باستاماسىمەن ٸسكە قوسىلىپ, ۇلتتىق رەسۋرستاردان تٷسەتٸن تابىستى ازاماتتار اراسىندا بٶلۋدٸڭ ماڭىزدى تەتٸكتەرٸنٸڭ بٸرٸنە اينالدى, دەپ حابارلايدى dalanews.kz.
جوبا ەكٸ ماقساتقا باعىتتالعان. بٸرٸ بولاشاق ۇرپاقتى قولداۋ بولسا, ەكٸنشٸسٸ - ۇلتتىق بايلىقتان تٷسەتٸن تابىستى حالىق يگٸلٸگٸنە پايدالانۋ.
باعدارلاما بويىنشا جينالعان قاراجاتتى تەك تۇرعىن ٷي جاعدايىن جاقسارتۋعا نەمەسە بٸلٸم الۋعا جۇمساۋعا بولادى. سونىمەن قاتار, كەمەلەتكە تولماعان ازاماتتار جٷيەگە اۆتوماتتى تٷردە قوسىلادى, ارنايى ٶتٸنٸش بەرۋدٸڭ قاجەتٸ جوق.
جيناق اقش دوللارىمەن ەسەپتەلەتٸندٸكتەن, قاراجات ينفلياتسييادان قورعالعان. ال قارجىنى 18 جاسقا تولعانعا دەيٸن پايدالانۋ مٷمكٸن ەمەس, بۇل ونىڭ ماقساتسىز جۇمسالۋىنا جول بەرمەيدٸ.
2026 جىلى باعدارلاماعا قاتىساتىن 6,9 ملن بالاعا ۇلتتىق قوردان 130,71 دوللاردان اۋدارىلعان.
ال 2026 جىلعى 1 قاڭتارعا دەيٸن 206 مىڭعا جۋىق ٶتٸنٸش ورىندالعان. ونىڭ ٸشٸندە تۇرعىن ٷي جاعدايىن جاقسارتۋعا 127 مىڭ ٶتٸنٸش بويىنشا 19,7 ملن دوللار, ال بٸلٸم الۋعا 78 مىڭ ٶتٸنٸش بويىنشا 12 ملن دوللار جۇمسالعان.
مامانداردىڭ ايتۋىنشا, قازٸر ەر بالاعا شاققانداعى سوما كٶپ كٶرٸنبەۋٸ مٷمكٸن. الايدا باعدارلاما جيناق جٷيەسٸمەن جۇمىس ٸستەيتٸندٸكتەن, ونىڭ نەگٸزگٸ تيٸمدٸلٸگٸ ۋاقىت ٶتە بايقالادى. ەسٸرەسە, باعدارلاماعا ۇزاق ۋاقىت قاتىسقان بالالار كٶبٸرەك قاراجات جيناي الادى.
