Semeılik áıel qarjy pıramıdasyn jarnamalaǵany úshin bes jylǵa bas bostandyǵynan aıyryldy, dep habarlaıdy Dalanews.kz.
Semeıdiń 57 jastaǵy turǵyny Aqtóbe, Atyraý, Aqtaý, Almaty, Semeı, Pavlodar qalalarynda turatyn basqa tulǵalarmen sóz baılasyp, 2016 jyly Aqtóbe turǵyny jasap shyǵarǵan smartfon túrindegi uıaly telefon arqyly paıdalanylatyn Shyǵys Qazaqstan oblysynyń turǵyndaryna arnalǵan "APPPORT" mobıldi qosymshasyn jarnamalap, úgit- nasıhat jumystaryn júrgizgen.
"UNNNITY corporation" JSHS saıtyna jeke bas paıdasyn kózdeı otyryp, qarajat tartý maqsatynda "APPPORT" mobıldi qosymshasyn paıdalanýshylar kásipkerlerge "APPPORT" portaly arqyly belgili bir merzimge deıin óz qyzmetterin jarnamalaýǵa múmkindigi bolatynyn aıtyp sendirgen. "UCREDIT" (vırtýaldi valúta) satyp alý kezinde, sondaı- aq jańa tulǵalardy tirkegen jaǵdaıda belsendi qatysýshylarǵa qosymsha bonýs alýǵa bolatyny týraly jalǵan aqparat taratqan", - delingen İİM taratqan habarlamada.
Kóptegen azamattar jarnamaǵa senip, 350 myńnan 2 mıllıon teńgege deıingi kólemde qarajattaryn salǵan. Osylaısha 2016-2024 jyldar aralyǵynda áıel óziniń tanystarymen birigip 2 myńǵa jýyq adamdy aldap, olarǵa jalpy somasy 2,5 mıllıard teńgege jýyq materıaldyq shyǵyn keltirgen.
Sot ony qylmystyq quqyq buzýshylyqty jasaǵany úshin kináli dep tanyp, Qazaqstan Respýblıkasy Qylmystyq kodeksiniń 217-baby boıynsha qylmystyq is qozǵalyp, 7 jyl merzimge qarjy jáne komersıalyq uıymdarda basshylyq qyzmet atqarý quqyǵynan aıyra otyryp, 5 jylǵa bas bostandyǵynan aıyrý jazasyn taǵaıyndady.
"Sottalǵan jazasyn óteý úshin Semeı qalasyndaǵy eń tómengi qaýipsizdik mekemesine keldi. Qazir ol karantın bóliminde jatyr. Onymen oqý-túsindirý jumystary júrgizilip jatyr, karantındik bólimnen shyqqannan keıin sot sheshimimen talap-aryzdardy óteý úshin aqy tólenetin jumysqa ornalasady", – deıdi mekeme basshysynyń orynbasary Darhan Bıgazıev.
