Qasym-Jomart Toqaev pen Haisam ben Tariq Ál Said keńeitilgen quramda kelissóz júrgizdi, dep habarlaidy dalanews.kz.
Kelissóz barysynda Memleket basshysy Oman Sultanyna iltipat tanytyp, onyń Sultan retinde Ortalyq Aziiaǵa alǵash ret saparmen kelgenin atap ótti.
"Omandy Qazaqstannyń arab álemindegi ýaqyt tezinen ótken ári senimdi seriktesi sanaimyz. Kelesi jyly aitýly data – Qazaqstan men Oman arasyndaǵy diplomatiialyq qarym-qatynastyń ornaǵanyna 35 jyl tolýyn zor maqtanyshpen atap ótemiz. Osy ýaqyt ishinde tatý dostyqqa, ózara qurmet pen qoldaýǵa negizdelgen seriktestiktiń jańa kezeńi úshin berik irgetas qalandy. Jaqynda Oman Premer-ministriniń ekonomikalyq máseleler jónindegi orynbasary Ziiazin ben Haisam Ál Said bastaǵan joǵary deńgeidegi delegatsiianyń Astanaǵa jasaǵan jemisti sapary memleketter arasyndaǵy qarym-qatynastyń jandana túskenin aiqyn kórsetedi", – dedi Qazaqstan Prezidenti.
Memleket basshysy qol jetkizgen ýaǵdalastyqtar baýyrlas halyqtarǵa aitarlyqtai paida ákelip, strategiialyq seriktestikti jańa deńgeige kóterýge yqpal etetinine senim bildirdi.
"Kelissózder qorytyndysy boiynsha ekonomikalyq yntymaqtastyqtyń túrli baǵyttaryn, sonyń ishinde energetika, kólik-logistika, aýyl sharýashylyǵy, aqparattyq tehnologiialar, tsifrlandyrý, densaýlyq saqtaý jáne basqa da salalardy qamtityn ekijaqty kelisimderge qol qoiamyz. Budan bólek, seriktestigimizdiń basym baǵyttaryn belgileitin Birlesken málimdeme qabyldaimyz", – dedi Qasym-Jomart Toqaev.
Prezident ortaq jobalardyń iske asyrylýyn oń baǵalady. Olardyń qatarynda "Dońǵa" munai ken ornyn igerý, Solidcore Resources kompaniiasynyń Pavlodar jáne Soltústik Qazaqstan oblystaryndaǵy kásiporyndary, Oman Investment Authority birlesken investitsiialyq qory, sondai-aq qonaq úi jáne shipajai infraqurylymyn damytý jobalary bar.
Oman Sultany Haisam ben Tariq Ál Said ystyq yqylaspen qarsy alǵany jáne tabysty kelissóz júrgizgeni úshin Qasym-Jomart Toqaevqa alǵys aityp, qazaq-oman yntymaqtastyǵynyń jan-jaqty damyp kele jatqanyn atap ótti.
"Oman Qazaqstanmen yqpaldastyqqa airyqsha mán beredi. Sońǵy jyldary eki eldiń áriptestigi tyń serpin aldy. Biz muny quptaimyz. Joǵary deńgeidegi elaralyq saparlar, Birlesken úkimetaralyq komissiia jumysy yntymaqtastyǵymyzdy áldeqaida nyǵaita túsýge múmkindik beredi", – dedi Oman Sultany.
Haisam ben Tariq Ál Saidtyń aitýynsha, Oman Qazaqstanmen energetika, taý-ken ónerkásibi, aýyl sharýashylyǵy, azyq-túlik qaýipsizdigi, kólik-logistika, qarjy qyzmetteri, týrizm, tehnologiia jáne jasandy intellekt sekildi kóptegen sektorda investitsiialyq yqpaldastyqty jolǵa qoiýǵa aitarlyqtai áleýet bar dep sanaidy.
"Biz derbes investitsiialyq institýttarymyzdyń, jeke sektor men arnaiy memlekettik qurylymdardyń múmkindikterin ushtastyratyn jobalardyń júzege asyrylýyn quptaimyz. Eleýli mańyzǵa ie salanyń biri – kólik bailanysy. Qazaqstan Aziia men Eýropany jalǵaityn jahandyq saýda dálizderiniń boiynda strategiialyq turǵydan utymdy ornalasqan. Al Oman Shyǵanaq, Úndi muhity, Aziia jáne Afrika elderiniń basty naryqtaryna tóte shyǵatyn teńiz joldaryn qamtamasyz etedi. Bir-birin tolyqtyratyn osy artyqshylyqtarymyz eki eldiń ósip-órkendeýine yqpal etip, paidaǵa kenelteri anyq. Sondyqtan kólik-logistika salasyndaǵy yntymaqtastyqty nyǵaitýǵa, sonyń ishinde Oman porttary arqyly saýda dálizderin birlese damytýǵa jáne elderimizdiń arasyndaǵy áýe qatynasyn jandandyrýǵa niettimiz", – dedi Oman Sultany.
Haisam ben Tariq Ál Said Prezident Qasym-Jomart Toqaevty ózine qolaily kez kelgen ýaqytta Omanǵa saparmen kelýge shaqyrdy.
