Qazaqstanda temirjol vagondarynyń tehnikalyq jaǵdaiyn avtomatty túrde anyqtaityn intellektýaldy diagnostikalaý júiesi engizilip jatyr, dep habarlaidy dalanews.kz.
Bul týraly Úkimet otyrysynda «Qazaqstan temir joly» basqarma tóraǵasy Eljas Otynshiev baiandady.
QTJ tasymaldaý protsesin tolyq tsifrlandyrýdy josparlap otyr. Jańa tásil júk jáne jolaýshylar tasymalyn, temirjol infraqurylymyn, qozǵalysty basqarýdy jáne tsifrlyq servisterdi biryńǵai júiege biriktirýge baǵyttalǵan.
«Bizdiń mindetimiz – ár protsesti jeke-jeke tsifrlandyrý emes, olardyń barlyǵyn tasymaldy basqarýdyń biryńǵai tsifrlyq júiesine biriktirý», – dedi Eljas Otynshiev.
Tsifrlyq júielerdiń turaqty jumysyn qamtamasyz etý úshin magistraldyq jelide LTE-R negizindegi QTJ-nyń jeke Private 4G tehnologiialyq bailanys jelisin qurý josparlanyp otyr. Ol 16 myń shaqyrymnan astam magistraldyq temirjol jelisin qamtidy.
Osy infraqurylym negizinde zamanaýi basqarý júieleri men jasandy intellekt tehnologiialaryn engizý kózdelgen. QTJ bul sheshimder tasymaldaý protsesiniń tiimdiligin 10–15 paiyzǵa arttyrýǵa múmkindik beredi dep kútedi.
Jobalardyń biri – Smart Diagnostika. Júie temirjol joldaryndaǵy aqaýlar men yqtimal táýekelderdi aldyn ala anyqtap, jaǵdai kúrdelene qoimai qajetti sharalardy qabyldaýǵa múmkindik beredi. Jobanyń 2030 jylǵa deiingi ekonomikalyq tiimdiligi 100 mlrd teńgeden asady dep baǵalanyp otyr.
Sonymen qatar jyljymaly quramdy intellektýaldy diagnostikalaý úshin KinetiX júiesi engizilýde. Buǵan deiin vagondardyń tehnikalyq jaǵdaiyn negizinen mamandar qolmen tekserse, jańa júie bul protsesti avtomattandyrady.
Kameralar men mashinalyq kórý tehnologiialary qozǵalystaǵy poiyzdardy avtomatty túrde tekserip, vagondardaǵy aqaýlardy anyqtaidy. Tehnikalyq tekserýdi qajet etetin vagondar aldyn ala belgilenedi.
Segiz ai ishinde júie arqyly 1 mln-nan astam vagon diagnostikalanǵan. Nátijesinde 17,6 myńnan astam aqaý anyqtaldy, onyń 448-i qaýipti dep tanylǵan.
Jańa tehnologiia poiyzdardy tehnikalyq tekserý ýaqytyn 30 paiyzǵa, al qol eńbegin 70 paiyzǵa qysqartýǵa múmkindik beredi.
QTJ-nyń tsifrlyq transformatsiiasy jolaýshylar tasymalyn da qamtidy. Qazirdiń ózinde 1 500-den astam vagon internetpen jabdyqtalǵan. Starlink spýtniktik bailanysy 51 baǵyttaǵy 108 poiyz quramynda iske qosylǵan.
Osylaisha Qazaqstan ishinde qatynaityn barlyq jolaýshylar poiyzdary internetke qosylǵan. Bul qyzmetti jyl saiyn 11 mln-nan astam jolaýshy paidalana alady.
Qazirgi ýaqytta QTJ «Transtelekom» AQ-men birlesip jolaýshylarǵa internet qyzmetin usyný sharttaryn pysyqtap jatyr.
