Qazaqstandaǵy depozitterdiń jalpy kólemi 50,16 trln teńgege jetip, 2026 jylǵa josparlanǵan memlekettik biýdjet kirisinen 2,2 ese asyp tústi, dep habarlaidy dalanews.kz.
2026 jylǵy tamyzda rezidentterdiń depozitteri bir aida 1,5 paiyzǵa tómendep, 50,16 trln teńgeni qurady. Soǵan qaramastan jyl basynan beri depozittik baza 4,5 paiyzǵa ósken.
Depozitterdiń tómendeýi negizinen shetel valiýtasyndaǵy salymdardyń qysqarýyna bailanysty boldy. Tamyz aiynyń sońynda ulttyq valiýtadaǵy depozitter 40,96 trln teńge, al shetel valiýtasyndaǵy depozitter 9,2 trln teńge boldy.
Bul rette zańdy tulǵalardyń depozitteri bir aida 3,9 paiyzǵa azaiyp, 21,62 trln teńgeni qurady. Al jeke tulǵalardyń salymdary kerisinshe 0,1 paiyzǵa ósip, 28,54 trln teńgege jetti.
Osylaisha, jeke tulǵalardyń bankterdegi depozitteri eldiń jalpy ishki óniminiń shamamen 17,9 paiyzyna teń. Halyqtyń salymdary zańdy tulǵalardyń depozitterinen shamamen 6,9 trln teńgege kóp.
Salystyrý úshin, 2026 jyly memlekettik biýdjetke túsetin túsimder 23,1 trln teńge kóleminde boljanǵan. Demek, bankterdegi depozitterdiń jalpy portfeli biýdjetke bir jylda túsedi dep kútiletin kiristen shamamen 2,2 ese joǵary.
