سەمەيلىك ايەل قارجى پيراميداسىن جارنامالاعانى ءۇشىن بەس جىلعا باس بوستاندىعىنان ايىرىلدى، دەپ حابارلايدى Dalanews.kz.
سەمەيدىڭ 57 جاستاعى تۇرعىنى اقتوبە، اتىراۋ، اقتاۋ، الماتى، سەمەي، پاۆلودار قالالارىندا تۇراتىن باسقا تۇلعالارمەن ءسوز بايلاسىپ، 2016 جىلى اقتوبە تۇرعىنى جاساپ شىعارعان سمارتفون تۇرىندەگى ۇيالى تەلەفون ارقىلى پايدالانىلاتىن شىعىس قازاقستان وبلىسىنىڭ تۇرعىندارىنا ارنالعان "APPPORT" ءموبيلدى قوسىمشاسىن جارنامالاپ، ۇگىت- ناسيحات جۇمىستارىن جۇرگىزگەن.
"UNNNITY corporation" ج ش س سايتىنا جەكە باس پايداسىن كوزدەي وتىرىپ، قاراجات تارتۋ ماقساتىندا "APPPORT" ءموبيلدى قوسىمشاسىن پايدالانۋشىلار كاسىپكەرلەرگە "APPPORT" پورتالى ارقىلى بەلگىلى ءبىر مەرزىمگە دەيىن ءوز قىزمەتتەرىن جارنامالاۋعا مۇمكىندىگى بولاتىنىن ايتىپ سەندىرگەن. "UCREDIT" (ءۆيرتۋالدى ۆاليۋتا) ساتىپ الۋ كەزىندە، سونداي- اق جاڭا تۇلعالاردى تىركەگەن جاعدايدا بەلسەندى قاتىسۋشىلارعا قوسىمشا بونۋس الۋعا بولاتىنى تۋرالى جالعان اقپارات تاراتقان"، - دەلىنگەن ءىىم تاراتقان حابارلامادا.
كوپتەگەن ازاماتتار جارناماعا سەنىپ، 350 مىڭنان 2 ميلليون تەڭگەگە دەيىنگى كولەمدە قاراجاتتارىن سالعان. وسىلايشا 2016-2024 جىلدار ارالىعىندا ايەل ءوزىنىڭ تانىستارىمەن بىرىگىپ 2 مىڭعا جۋىق ادامدى الداپ، ولارعا جالپى سوماسى 2،5 ميلليارد تەڭگەگە جۋىق ماتەريالدىق شىعىن كەلتىرگەن.
سوت ونى قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىپ، قازاقستان رەسپۋبليكاسى قىلمىستىق كودەكسىنىڭ 217-بابى بويىنشا قىلمىستىق ءىس قوزعالىپ، 7 جىل مەرزىمگە قارجى جانە كوممەرسيالىق ۇيىمداردا باسشىلىق قىزمەت اتقارۋ قۇقىعىنان ايىرا وتىرىپ، 5 جىلعا باس بوستاندىعىنان ايىرۋ جازاسىن تاعايىندادى.
"سوتتالعان جازاسىن وتەۋ ءۇشىن سەمەي قالاسىنداعى ەڭ تومەنگى قاۋىپسىزدىك مەكەمەسىنە كەلدى. ءقازىر ول كارانتين بولىمىندە جاتىر. ونىمەن ءوقۋ-تۇسىندىرۋ جۇمىستارى جۇرگىزىلىپ جاتىر، كارانتيندىك بولىمنەن شىققاننان كەيىن سوت شەشىمىمەن تالاپ-ارىزداردى وتەۋ ءۇشىن اقى تولەنەتىن جۇمىسقا ورنالاسادى"، – دەيدى مەكەمە باسشىسىنىڭ ورىنباسارى دارحان بيگازييەۆ.
