Qazaqstanda azamattardyń tabysy men shyǵysyn salystyratyn Smart Data Finance júiesi jumys isteidi. Eger adamnyń resmi tabysy men satyp alǵan múlki arasynda úlken aiyrmashylyq baiqalsa, salyq organdary qarajattyń qaidan kelgenin suratýy múmkin, dep habarlaidy dalanews.kz.
Bul týraly Qarjy vitse-ministri Áset Turysov málimdedi. Onyń aitýynsha, salyq organdary qazaqstandyqtardyń bank aýdarymdaryn erkin baqylamaidy. Alaida arnaiy aqparattyq júie ártúrli memlekettik derekqorlardan málimet jinap, azamattardyń tabysy men shyǵysyn salystyrýǵa múmkindik beredi.
Smart Data Finance júiesine 80-ge jýyq derekkózden aqparat túsedi. Onyń ishinde jyljymaityn múlik, avtokólik, jer telimderi jáne basqa da múlik týraly málimetter bar. Salyq qyzmeti bul derekterdi Azamattardyń resmi tabysy týraly aqparatpen salystyrady.
Mysaly, azamat ai saiyn 300 myń teńge jalaqy alatynyn kórsetip, basqa tabys kózderin deklaratsiialamasa, biraq 100 mln teńge turatyn páter nemese birneshe qymbat kólik satyp alsa, júie mundai sáikessizdikti anyqtai alady.
Mundai jaǵdaida salyq organdary azamattan qarajattyń shyǵý tegin túsindirýdi suraýǵa quqyly. Vitse-ministrdiń aitýynsha, qazirgi ýaqytta salyqtyq ákimshilendirýdiń aqparattyq júiesi turaqty jumys istep tur. Biyl iri tehnikalyq aqaýlar tirkelmegen.
Al eger aqparattyq júiedegi aqaý aýyr saldarǵa ákelse, oǵan jaýapty laýazymdy tulǵa ákimshilik jaýapkershilikke tartylyp, aiyppul tóleýi múmkin.
