Abai oblysy ákiminiń orynbasary Bekjan Bapyshev Semei qalasyndaǵy jylytý maýsymynyń ótý barysyna qatysty pikir bildirdi, dep habarlaidy dalanews.kz.
Onyń aitýynsha, búginde oblys jylytý maýsymyna tolyq daiyn, jylý berý jumystary shtattyq rejimde júrgizilip jatyr.
1 qazannan bastap Semeidegi áleýmettik nysandar kezeń-kezeńimen jylý júiesine qosyldy. Qazirgi ýaqytta kópqabatty turǵyn úilerge de jylý berý jumystary júrgizilýde.
"Semei qalasy boiynsha 2 jyldyq ótpeli 5 joba bar. 1 joba boiynsha merdiger uiym tarapynan olqylyqtar boldy. Iaǵni, qurylǵylar ýaqytynda jetkizilmedi. Búgingi kúni qurylǵylar tolyǵymen ornatyldy. Biz jylytý maýsymyna tolyǵymen kirdik. Birinshi kezekte áleýmettik nysandar qosyldy. Ekinshi kezekte turǵyn úiler qosylyp jatyr. Turǵyndardyń alańdaýyna esh negiz joq ekenin jetkizgimiz keledi", - dedi ol.
Bekjan Bapyshev óńirdegi jylýmen qamtý máselesi turaqty baqylaýda ekenin atap ótti.
