QR Qarjy ministrligine taýarlardy, jumystar men kórsetiletin qyzmetterdi satyp alý kezinde kvazimemlekettik sektor sýbektileri jasaǵan ákimshilik quqyq buzýshylyq týraly isterdi qaraý quzyreti berildi. Joǵary aýditorlyq palatanyń usynymy boiynsha zańnamaǵa túzetýler engizildi, dep habarlaidy Dalanews.kz.
Ákimshilik quqyq buzýshylyq týraly kodekste tiisti normanyń bolmaýy kvazimemlekettik sektor sýbektilerin buzýshylyqtary úshin ákimshilik jaýaptylyqqa tartýǵa múmkindik bermedi.
QR Úkimetine zańnamalyq kolliziialardy joiý maqsatynda Ákimshilik quqyq buzýshylyq týraly kodekske ózgerister men tolyqtyrýlar engizý usynyldy. Atap aitqanda, Qarjy ministrligine taýarlardy, jumystardy jáne kórsetiletin qyzmetterdi (ÁQtK-niń 207-1-baby boiynsha) satyp alý kezinde kvazimemlekettik sektor sýbektileri jasaǵan ákimshilik quqyq buzýshylyq týraly isterdi qaraý quzyretin bekitý.
"2025 jylǵy 10 qańtarda Qazaqstan Respýblikasynyń "Ákimshilik quqyq buzýshylyq týraly" Kodeksiniń 722-babynyń birinshi bóligine túzetýler engizildi. Nátijesinde Qarjy ministrligi kvazimemlekettik kompaniialardyń satyp alýlaryndaǵy buzýshylyqtarǵa jedel den qoiyp, óz tergeýleriniń qorytyndysy boiynsha jaýapqa tartýǵa múmkindik aldy", delingen Joǵary aýditorlyq palatanyń habarlamasynda.
Satyp alý qaǵidalaryn buzǵany úshin ákimshilik jaýapkershilik táýekelin túsiný kvazimemlekettik sektor sýbektilerin normalardy muqiiat saqtaýǵa yntalandyryp, jalpy satyp alý tártibin arttyrady. Bul rette anyqtalǵan buzýshylyqtardy taldaý Qarjy ministrligine júieli problemalardy anyqtaýǵa jáne satyp alý protsesterin odan ári jetildirý úshin normativtik-quqyqtyq bazaǵa ózgerister engizýge múmkindik beredi.
Esterińizge sala keteiik, 2022 jylǵy 1 aqpanda Memleket basshysy Qasym-Jomart Toqaev sybailas jemqorlyqqa qarsy is-qimyl máseleleri jónindegi keńes barysynda barlyq memlekettik satyp alý júiesin jáne kvazimemlekettik sektordaǵy satyp alýdy qaita qaraý týraly tapsyrma bergen bolatyn.
Buǵan deiin saitymyzda Básekelestikti qorǵaý jáne damytý agenttigi "Qorǵas-Kommerts", "Qorǵas-Energo" jáne "Qorǵas-Servis" JShS-lardy jekeshelendirýdi usynǵanyn jazǵanbyz. Sondai-aq "Samuryq-Energo" memlekettik kompaniiasy Óskemen jáne Shúlbi GES-terin arab investoryna emes, óziniń enshiles kompaniialarynyń birine satqany belgili boldy.
