Qazaqstanda biýdjettik kreditteý qaǵidalaryna ózgerister engizildi. Bul týraly Qazaqstan Respýblikasy Qarjy ministrligi málimdedi, dep habarlaidy Dalanews.kz.
Jańa túzetýler qaryzdy qaita qurylymdaý tetikterin naqtylap, aiyppul sanktsiialaryn esepten shyǵarýǵa múmkindik beredi. Sonymen qatar birqatar rásimdik ókilettikter vedomstvo ishinde qaita bólingen.
Jańartylǵan qaǵidalarǵa sáikes, biýdjettik kreditterdi qaita qurylymdaý tásilderiniń tizimi keńeitildi. Endi qaryz boiynsha eseptelgen aiyppuldar men ósimpuldardy tolyq nemese ishinara esepten shyǵarý qarastyrylǵan. Buǵan deiin qaita qurylymdaý kóbine qaryzdy óteý merzimin nemese tólem kestesin ózgertý arqyly júzege asyrylatyn.
Jańa redaktsiiada kredit berý sharttaryn ózgertý aiasynda aiyppul sanktsiialaryna qatysty bereshekti retteý múmkindigi engizildi. Bul norma biýdjettik kreditter boiynsha aiyppuldar men ósimpuldar jinalyp qalǵan qaryz alýshylardyń bereshegin retteýge qoldanylýy múmkin. Alaida qujatta bul tetikti naqty qai sanattaǵy qaryz alýshylar paidalana alatyny kórsetilmegen.
Sonymen qatar túzetýler sheshim qabyldaý tártibine de áser etti. Atap aitqanda, biýdjettik kreditterdi igerý merzimin ózgertý kezinde buryn mindetti bolǵan Respýblikalyq biýdjet komissiiasynyń qorytyndysyn alý talaby alynyp tastaldy. Endi kreditteý sharttaryn túzetýge qatysty keibir sheshimderdi Qarjy ministrligi vedomstvolyq rásimder aiasynda óz betinshe qabyldai alady.
Qujatta biýdjettik kreditterdi merziminen buryn óteý tártibine de ózgerister engizilgen. Jańa normaǵa sáikes, qaryz merziminen buryn qaitarylǵan jaǵdaida tólem kestesindegi alǵashqy úsh kezekti tólem ózgerissiz qalady.
Jalpy alǵanda, engizilgen túzetýler biýdjettik kreditterdiń sharttaryn ózgertý men bereshekti retteý rásimderiniń ákimshilik tártibin naqtylaýǵa baǵyttalǵan.
