QR Qarjy ministrligi 2025-2027 jyldarǵa arnalǵan respýblikalyq biýdjet boiynsha Joǵary aýditorlyq palatanyń usynymdarynyń shamamen 90%-yn qabyldady. Máselen, jańa úsh jyldyq biýdjetti qarastyrý aiasynda Joǵary aýditorlyq palata jalpy somasy 132 mlrd teńgege usynymdar bergen, dep habarlaidy Dalanews.kz.
Joǵary aýditorlyq palata usynymdarynyń oryndalýy boiynsha norma qazir Parlament qaraýynda. Bul týraly 2025-2027 jyldarǵa arnalǵan respýblikalyq biýdjettiń jobasy qaralǵan Senattyń jalpy otyrysynan keiin QR Joǵary aýditorlyq palata tóraǵasy Álihan Smaiylov aityp berdi.
Álihan Smaiylov Joǵary aýditorlyq palata jumys qorytyndysy boiynsha ne nusqama, ne usynym beretinin atap ótti. Nusqamalar tolyq kólemde oryndalady jáne Joǵary aýditorlyq palatanyń baqylaýynda bolady. Al usynymdar biýdjettik baǵdarlamalar ákimshileriniń qalaýy boiynsha oryndalady.
"Sońǵy 5 jylda Joǵary aýditorlyq palata tarapynan berilgen usynymdarǵa qarasaq, júielik sipattaǵy usynymdardyń shamamen 70%-y oryndalǵanyn kóremiz. Belgili bir biýdjet qarajatyn ońtailandyrýǵa baǵyttalǵan rásimdik sipattaǵy usynymdar boiynsha oryndalý paiyzy tómenirek", — dedi QR Joǵary aýditorlyq palata tóraǵasy.
Sonymen birge Álihan Smaiylov biyl usynymdardyń oryndalý deńgeii oń dinamika kórsetip otyrǵanyn atap ótti. Máselen, jańa úsh jyldyq biýdjetti qarastyrý aiasynda Joǵary aýditorlyq palata jalpy somasy 132 mlrd teńgege usynymdar berdi: 3 mlrd teńgege shyǵystardy qysqartý, 12 mlrd teńgege qosymsha qarjylandyrý, 117 mlrd teńgege qarajatty qaita bólý.
"Qarjy ministrliginiń bizge bergen aqparatyna sáikes usynymdardyń 90%-y maquldandy jáne qabyldandy. Iaǵni, 132 mlrd teńgeniń 116 mlrd teńgesi boiynsha usynymdar qoldaý tapty. Sondyqtan biyl usynymdardy oryndaý boiynsha jaǵdai áldeqaida jaqsy", — dedi Álihan Smaiylov.
Sonymen qatar Álihan Smaiylov qazirgi ýaqytta QR Joǵary aýditorlyq palatasynyń usynymdarynyń dárejesin kóterýge arnalǵan normalar Májilis qaraýynda ekenin atap ótti.
"Atap aitqanda, Úkimettiń ótken jylǵy biýdjettiń atqarylýy jónindegi esebinde Úkimet Parlament aldynda Joǵary aýditorlyq palatanyń usynymdarynyń oryndalýy týraly esep beretin mindetti bólim bolýǵa tiis. Sonymen qatar usynymdardyń oryndalýy Joǵary aýditorlyq palatanyń kelisimimen baqylaýdan alynatyny týraly da normany usynyp otyrmyz. Osy normalardy qabyldaý arqyly jaǵdai aitarlyqtai jaqsarady dep oilaimyn", dep qorytyndylady óz sózin Álihan Smaiylov.
