ق ر قارجى مينيسترلىگى 2025-2027 جىلدارعا ارنالعان رەسپۋبليكالىق بيۋدجەت بويىنشا جوعارى اۋديتورلىق پالاتانىڭ ۇسىنىمدارىنىڭ شامامەن 90%-ىن قابىلدادى. ماسەلەن، جاڭا ءۇش جىلدىق بيۋدجەتتى قاراستىرۋ اياسىندا جوعارى اۋديتورلىق پالاتا جالپى سوماسى 132 ملرد تەڭگەگە ۇسىنىمدار بەرگەن، دەپ حابارلايدى Dalanews.kz.

جوعارى اۋديتورلىق پالاتا ۇسىنىمدارىنىڭ ورىندالۋى بويىنشا نورما ءقازىر پارلامەنت قاراۋىندا. بۇل تۋرالى 2025-2027 جىلدارعا ارنالعان رەسپۋبليكالىق بيۋدجەتتىڭ جوباسى قارالعان سەناتتىڭ جالپى وتىرىسىنان كەيىن ق ر جوعارى اۋديتورلىق پالاتا ءتوراعاسى ءاليحان سمايىلوۆ ايتىپ بەردى.

ءاليحان سمايىلوۆ جوعارى اۋديتورلىق پالاتا جۇمىس قورىتىندىسى بويىنشا نە نۇسقاما، نە ۇسىنىم بەرەتىنىن اتاپ ءوتتى. نۇسقامالار تولىق كولەمدە ورىندالادى جانە جوعارى اۋديتورلىق پالاتانىڭ باقىلاۋىندا بولادى. ال ۇسىنىمدار بيۋدجەتتىك باعدارلامالار اكىمشىلەرىنىڭ قالاۋى بويىنشا ورىندالادى.

"سوڭعى 5 جىلدا جوعارى اۋديتورلىق پالاتا تاراپىنان بەرىلگەن ۇسىنىمدارعا قاراساق، جۇيەلىك سيپاتتاعى ۇسىنىمداردىڭ شامامەن 70%-ى ورىندالعانىن كورەمىز. بەلگىلى ءبىر بيۋدجەت قاراجاتىن وڭتايلاندىرۋعا باعىتتالعان راسىمدىك سيپاتتاعى ۇسىنىمدار بويىنشا ورىندالۋ پايىزى تومەنىرەك"، — دەدى ق ر جوعارى اۋديتورلىق پالاتا ءتوراعاسى.

سونىمەن بىرگە ءاليحان سمايىلوۆ بيىل ۇسىنىمداردىڭ ورىندالۋ دەڭگەيى وڭ ديناميكا كورسەتىپ وتىرعانىن اتاپ ءوتتى. ماسەلەن، جاڭا ءۇش جىلدىق بيۋدجەتتى قاراستىرۋ اياسىندا جوعارى اۋديتورلىق پالاتا جالپى سوماسى 132 ملرد تەڭگەگە ۇسىنىمدار بەردى: 3 ملرد تەڭگەگە شىعىستاردى قىسقارتۋ، 12 ملرد تەڭگەگە قوسىمشا قارجىلاندىرۋ، 117 ملرد تەڭگەگە قاراجاتتى قايتا ءبولۋ.

"قارجى مينيسترلىگىنىڭ بىزگە بەرگەن اقپاراتىنا سايكەس ۇسىنىمداردىڭ 90%-ى ماقۇلداندى جانە قابىلداندى. ياعني، 132 ملرد تەڭگەنىڭ 116 ملرد تەڭگەسى بويىنشا ۇسىنىمدار قولداۋ تاپتى. سوندىقتان بيىل ۇسىنىمداردى ورىنداۋ بويىنشا جاعداي الدەقايدا جاقسى"، — دەدى ءاليحان سمايىلوۆ.

سونىمەن قاتار ءاليحان سمايىلوۆ قازىرگى ۋاقىتتا ق ر جوعارى اۋديتورلىق پالاتاسىنىڭ ۇسىنىمدارىنىڭ دارەجەسىن كوتەرۋگە ارنالعان نورمالار ءماجىلىس قاراۋىندا ەكەنىن اتاپ ءوتتى.

"اتاپ ايتقاندا، ۇكىمەتتىڭ وتكەن جىلعى بيۋدجەتتىڭ اتقارىلۋى جونىندەگى ەسەبىندە ۇكىمەت پارلامەنت الدىندا جوعارى اۋديتورلىق پالاتانىڭ ۇسىنىمدارىنىڭ ورىندالۋى تۋرالى ەسەپ بەرەتىن مىندەتتى ءبولىم بولۋعا ءتيىس. سونىمەن قاتار ۇسىنىمداردىڭ ورىندالۋى جوعارى اۋديتورلىق پالاتانىڭ كەلىسىمىمەن باقىلاۋدان الىناتىنى تۋرالى دا نورمانى ۇسىنىپ وتىرمىز. وسى نورمالاردى قابىلداۋ ارقىلى جاعداي ايتارلىقتاي جاقسارادى دەپ ويلايمىن"، دەپ قورىتىندىلادى ءوز ءسوزىن ءاليحان سمايىلوۆ.