Atyshýly Talǵar isi boiynsha 15 táýlikke qamalǵan Qarjaýbai Nurymovtyń qaryndasy Baqyt Reimova bostandyqqa shyǵyp, otbasyna oraldy, dep habarlaidy Dalanews.kz Alash.KZ-ke siltep.
Bul týraly bloger Jan Ahmadiev óziniń jelidegi paraqshasynda jariialady.
"Baqyt otbasyna óziniń týǵan kúninde oraldy" dep jazdy bloger.
Blogermen birge Baqyttyń qýanyshyna zańger Meiirman Shekeev te barǵan. Reimovanyń Qazaqstanda qalý-qalmaýy týraly zańger aldaǵy kúnderi aitatynyn, degenmen elde qaldyrý úshin jumys istep jatqandaryn aitqan.
Eske salaiyq, buǵan deiin Talǵardaǵy janjal kezinde qaza tapqan jasóspirim Sherzat Bolattyń ákesi Qarjaýbai Nurymovtyń qaryndasy Baqyt Reimovaǵa da «mitingke úndegeni úshin» degen aiyp taǵylyp, 15 táýlikke qamaýǵa alynǵan bolatyn. Sonymen qatar Reimovany sot Qazaqstannan deportatsiialaý jóninde sheshim shyǵarǵan. Biraq advokaty munymen kelispeitinin aitty.
Bloger Jan Ahmadiev advokat Meiirman Shekeevtiń pikirin suraǵan eken. Ol qazir osy ispen ainalysyp jatyr.
– Baqyt qazir Uzynaǵashtaǵy ýaqytsha ustaý izoliatorynda otyr. Biz sol jerge baryp qaittyq. Apeliatsiialyq shaǵymdy daiyndap qoidyq. Oǵan Ákimshilik kodekstiń 488-babynyń 8-bóligi boiynsha aiyp taǵylǵan. Iaǵni sheteldikter, azamattyǵy joq adamdar jasaǵan áreket boiynsha qamaýda otyr. Qazaqstannan deportatsiialaý jóninde jaza kesilgen. Biz munymen kelispeimiz. Qaýlyda birneshe zańbuzýshylyq bar. Baqytqa zańsyz demonstratsiia, piketke úndedi degen aiyp taǵylǵan. Biraq zańdaǵy anyqtamaǵa sáikes mundai zańsyz jiynǵa shaqyrýdyń uiymdastyrýshysy bolady. Reimovanyń ondai kinási dáleldenbegen. Sosyn balasynyń qujatyn suratqan. Balasy Qazaqstanda dúniege kelgen. Bala men anany ajyratýǵa bolmaidy. Qazaqstan ana men balany ajyratpaýǵa mindetti. Sot osy halyqaralyq shartty óreskel buzǵan. Baqyttyń etnikalyq qazaq ekeni eskerilmegen. «Qandas» degen qujaty bar. Olardy deportatsiialaýǵa bolmaidy. Óitkeni baratyn jeri joq. Otany – Qazaqstan. Biz kinásizdigin dáleldep, Qazaqstanda qaldyrýǵa tyrysyp jatyrmyz, – deidi Meiirman Shekeev.
Eske salaiyq,Sherzat Bolattyń birneshe týysy qamaýǵa alynǵan bolatyn.
Eńbekshiqazaq aýdandyq soty ákimshilik is júrgizý tártibimen isterdi qaraý nátijeleri boiynsha azamat Saltanat Nurymova usaq buzaqylyq jasaǵany úshin (ÁQBtK 434-babynyń 1-bóligi) 20 AEK mólsherinde aiyppul salýmen ákimshilik jaýapkershilikke tartyldy.
QR beibit jinalystardy uiymdastyrý jáne ótkizý tártibi týraly zańnamasyn buzǵany úshin (ÁQBtK 488- babynyń 8-bólimi.) azamattyǵy joq Baqyt Reimova ákimshilik tártippen 15 táýlikke qamaýǵa alynyp, keiinnen QR sheginen shyǵaryp jiberildi.
Qoǵamdyq orynda balaǵat sózder aitqany, quqyq qorǵaý organdarynyń qyzmetkerlerin qorlap, sondai-aq qoǵamdyq tártip pen azamattardyń tynyshtyǵyn buzatyn ainalasyndaǵylarǵa qurmetsizdik tanytatyn is-áreketter jasaǵany jáne kólik quraldarynyń qozǵalysy úshin kedergiler jasaǵany úshin Qarjaýbai Nurymov 15 táýlikke ákimshilik qamaýǵa alyndy.
10 jeltoqsanda marqum Sherzat Bolattyń otbasy Nurqanat Ǵaiypbaevty jer qoinyna tapsyrdy. Jerleý rásiminen keiin Qarjaýbai Nurymov qolyna pyshaq ustap, BAQ ókilderimen kezdesýdi talap etti. Atalǵan oqiǵadan keiin Nurymovty politsiia qyzmetkerleri ustap áketti.
Resmi derekke súiensek, saǵat 15:30 shamasynda Azat aýylynda jerleý rásimi kezinde qoǵamdyq tártip buzylǵan. Aitýlarynsha, Qarjaýbai Nurymov qolyna pyshaq ustap, óz-ózine qol jumsamaq bolǵan.
"Qarjaýbai Nurymov prokýrordyń zańdy saqtaý týraly túsindirmelerin elemedi. Shekten tys agressivti minez-qulyq tanytyp, basqalardy óz-ózine qol jumsaimyn dep qorqytty. Sonymen qatar politsiia qyzmetkerine pyshaqpen shabýyl jasady. Onyń minez-qulqy ózine de, basqalarǵa da qaýip tóndirdi", - delingen habarlamada.
