Hizoka esimdi Threads qoldanýshysy 12–13 sáýir kúnderi Qyzylorda – Petropavl baǵytyndaǵy poiyzda bolǵan jantúrshigerlik jaǵdaidy baiandady. Ol oqiǵanyń basty keiipkeri — jalǵyz saparǵa shyqqan qurbysy ekenin aitady. Jas qyz jol boiy poiyz qyzmetkeriniń qorlyǵyna tap bolǵan, dep habarlaidy Dalanews.kz.
Jazba avtorynyń aitýynsha, jolserik qurbysyna oǵash áreket kórsetken. Oqiǵa 076HA poiyzynda órbigen. Qyzǵa qyzmet kórsetýi tiis bolǵan jolserik — Jánibek esimdi azamat — kúmándi ári ersi áreketterge barǵan.
Jolaýshy qyzdyń sózine súiensek, jolserik oǵan qyryndap, betinen sipaýǵa tyrysqan. Tipti tambýrǵa shaqyryp, "taza aýa jutaiyq" dep májbúrlegen. Qyz bas tartqanymen, er adam óz degeninen qaitpaǵan.
"Qatty uiyqtadyń ǵoi" degen sekildi orynsyz sózder aityp, artynan "pospi, nochiý ne dam spat" dep qorqytqan. Jol-jónekei qolyn qysyp, jaqyndamaq bolǵan.
"Qurbym basqa jolserikten kómek surap, kórshi vagondaǵy apalar otyrǵan orynǵa aýysqan. Alaida álgi Jánibek ony sonda da izdep taýyp, qaitadan mazasyn alǵan. Tipti "Men seni izdep júrmin, seniń ornyńda basqa adamdar otyr ǵoi" dep dóreki sóilegen", - deidi jeli qoldanýshysy.
Eń soraqysy — jolaýshy qyz ne bolyp jatqanyn aityp, kómek suraǵanda, eshbir jolaýshy arasha túspegen.
Qyzdyń qaýipsizdigin tek dosy onlain baqylaýǵa májbúr bolǵan.
Jolaýshy qyz jaǵdaidy aǵa jolserikke jetkizgenimen, naqty shara qoldanylmaǵan. Suraqtar qoiylyp, mán-jai suralǵanymen, jaýapkershilik júktelmegen. Tek jazba avtorynyń Astanadaǵy tanystarynyń aralasýy nátijesinde ǵana álgi jolserik kelip, keshirim suraýǵa tyrysqan.
"Biraq onyń aitqan sózi tipti aqtaýǵa kelmeidi: "Men jai ázildedim. Bárin qate túsindiń. Men saǵan qaryndasymdai qaradym", — dep aqtalǵan", — deidi jazba avtory.
Jazba sońynda avtor eldegi qoǵamdyq qaýipsizdik máselesin kóterip, shuǵyl shara qabyldaý qajettigin alǵa tartty.
"Bizdiń elde tipti poiyz ishi de qaýipti. Eń soraqysy — mundai jaǵdaida ainalamyzdaǵy adamdar únsiz qalyp jatady, kómek berýge umtylmaidy. Qorqaqtyq bizdi adamdyq qasietten aiyryp barady. Biraq úndemesek — bul jaǵdai taǵy qaitalanady. Bul orynda sizdiń qyzyńyz, qaryndasyńyz ne qurbyńyz bolýy múmkin", — dep qynjyldy ol.
Hizoka bul jazbasyn Threads paraqshasyna jariialap, eldiń nazaryn jolaýshylar qaýipsizdigine aýdarýdy maqsat etken. Jazba birneshe saǵattyń ishinde keń taralyp, qyzý talqyǵa tústi.
“Qazirgi tańda Janǵaraev Jánibek esimdi jolseriktiń áreketine bailanysty tiisti organdardyń qandai da bir naqty shara qoldanatyny belgisiz. Degenmen qoǵam únsiz qalsa, mundai oqiǵalar jalǵasa bermek”, — dep sózin túiindedi ol.
Eske salaiyq, 2018 jyly qarasha aiynda elordadaǵy ǵylymi konferentsiiadan Aqtóbege qaityp bara jatqan áieldi "Tulpar-Talgo" poiyzynda eki jolserik birinen soń biri zorlap, qiianat jasamaq bolǵany týraly jazǵan edik.
"NeMolchiKZ" zorlyq-zombylyqqa qarsy qoǵamdyq qozǵalys" qorynyń basshysy Dina Tańsári jantúrshigerlik oqiǵany kótergen bolatyn.
Is Qylmystyq kodekstiń "Zorlaý" baby boiynsha qaralyp, 2019 jyly eki jolserik Q.S.Qurmaniiaz jáne J.A.Ýmbetaliev 5 jylǵa bas bostandyǵynan aiyryldy.
“Aqtóbe oblystyq soty 23.08.2022 jyly sottalýshy Q.S.Qurmaniiazdyń jeke shaǵymymen kelip túsken jadyǵatty qarady. Sottalýshy Q.S.Qurmaniiaz taǵaiyndaǵan jazasynyń 1/2 bóligin ótegen. KA-168/2 mekemesiniń ákimshiligi tarapynan jaqsy jaǵynan minezdeletini, eki ret kótermeleý sharalaryna ie bolǵany, sot úkimimen memleket kirisine óndirilgen protsestik shyǵyndy jáne jábirlenýshiniń ótemaqy qoryna óndirilgen májbúrli tólemdi tolyq tólengeni eskerildi. Aqtóbe qalasynyń №2 soty 22.06.2022 jylǵy qaýlynyń kúshin joiyp, sottalýshy Q.S.Qurmaniiazdyń shartty túrde bosatý týraly ótinishin qanaǵattandyrdy, - dep habarlady Aqtóbe qalasynyń №2 sotynyń baspasóz qyzmeti.
