Aımannyń aıtýynsha, ol halyq arasynda, azamattarmen etene baılanys jumys istegendi jany qalaıdy. Úlken-kishige qamqor jáne armanshyl jan. Jeke isim bolsa degen maqsaty boldy. Satýshy bolyp jumys isteı júrip, jemis-jıdekterden sebetter men gúl shoqtaryn ázirleý oıyna keldi.
– Turmysqa shyqqannan keıin Úsharal qalasyna kóship keldim. Joldasyma óz isimizdi ashyp, kásipkerlikpen aınalysýdy usyn,anymda birden qoldady. Kókónister men jemisterden sebetter men gúl shoqtaryn jasaýdy, sonymen qatar shaǵyn dúken ashýdy josparladym. «Atamekenge» barǵanymda munyń bárin qalaı júzege asyrý kerektigin túsindirdi. Qoldaý sharalarynyń biri «Bastaý» jobasy boldy. Karantındik sharalarǵa baılanysty oqý onlaın túrde júrgizildi. Degenmen de, ózim úshin kóptegen paıdaly jáne qyzyqty nárselerdi úırendim, – dedi kásipker.
2020 jyldyń qazan aıynda Aıman «Eńbek» baǵdarlamasy boıynsha 555 600 teńge grant aldy. Osy qarajatqa ol tońazytqysh jabdyqtaryn, sórelerdi satyp aldy. Úsharal qalasynyń tyǵyz ornalasqan aýdandarynyń birinen dúkenge arnalǵan oryndy jalǵa aldy.
– Qazirgi ýaqytta dúken ashyp, siz eshkimdi tań qaldyrmaısyz, biraq men úshin bul ómirdegi úlken jáne táýekelge toly qadam edi. Ary qaraı óz betimizshe aıaqqa tura alatynymyzǵa zor úmit pen senim boldy. Qazir eki adamdy jumyspen qamtyp otyrmyn. Barlyq kókónister men jemisterdi senimdi jetkizýshilerden satyp alamyz. Zaman aǵymyna saı bolý úshin onlaın jetkizý qyzmetin iske qostyq. Instagram paraqshasy jáne WhatsApp arqyly tapsyrys qabyldaýdy jolǵa qoıdyq, –dep atap ótti ol.
Sonymen qatar, Aıman tapsyrys boıynsha avtorlyq sebetter men gúlshoqtaryn jasaıdy. Mundaı qyzmet Úsharal úshin jańa kásip túri bolǵan soń, qala turǵyndary tarapynan suranys joǵary.
Bıyl kásipker óziniń avtorlyq sebetter men gúl shoqtaryn satý boıynsha jeke saýda núktesin ashyp, jańa dúken ashýdy josparlap otyr. Sondaı-aq, jaqyn mańdaǵy Qazaqstan, Beskól, Janama, Eńbekshi, Jaıpaq jáne Maı aýyldaryna da kókónister men jemister jetkizýdi uıymdastyrý oıda bar.
