ايماننىڭ ايتۋىنشا، ول حالىق اراسىندا، ازاماتتارمەن ەتەنە بايلانىس جۇمىس ىستەگەندى جانى قالايدى. ۇلكەن-كىشىگە قامقور جانە ارمانشىل جان. جەكە ءىسىم بولسا دەگەن ماقساتى بولدى. ساتۋشى بولىپ جۇمىس ىستەي ءجۇرىپ، جەمىس-جيدەكتەردەن سەبەتتەر مەن گۇل شوقتارىن ازىرلەۋ ويىنا كەلدى.
– تۇرمىسقا شىققاننان كەيىن ءۇشارال قالاسىنا كوشىپ كەلدىم. جولداسىما ءوز ءىسىمىزدى اشىپ، كاسىپكەرلىكپەن اينالىسۋدى ۇسىن،انىمدا بىردەن قولدادى. كوكونىستەر مەن جەمىستەردەن سەبەتتەر مەن گۇل شوقتارىن جاساۋدى، سونىمەن قاتار شاعىن دۇكەن اشۋدى جوسپارلادىم. «اتامەكەنگە» بارعانىمدا مۇنىڭ ءبارىن قالاي جۇزەگە اسىرۋ كەرەكتىگىن ءتۇسىندىردى. قولداۋ شارالارىنىڭ ءبىرى «باستاۋ» جوباسى بولدى. كارانتيندىك شارالارعا بايلانىستى وقۋ ونلاين تۇردە جۇرگىزىلدى. دەگەنمەن دە، ءوزىم ءۇشىن كوپتەگەن پايدالى جانە قىزىقتى نارسەلەردى ۇيرەندىم، – دەدى كاسىپكەر.
2020 جىلدىڭ قازان ايىندا ايمان «ەڭبەك» باعدارلاماسى بويىنشا 555 600 تەڭگە گرانت الدى. وسى قاراجاتقا ول توڭازىتقىش جابدىقتارىن، سورەلەردى ساتىپ الدى. ءۇشارال قالاسىنىڭ تىعىز ورنالاسقان اۋداندارىنىڭ بىرىنەن دۇكەنگە ارنالعان ورىندى جالعا الدى.
– قازىرگى ۋاقىتتا دۇكەن اشىپ، ءسىز ەشكىمدى تاڭ قالدىرمايسىز، ءبىراق مەن ءۇشىن بۇل ومىردەگى ۇلكەن جانە تاۋەكەلگە تولى قادام ەدى. ارى قاراي ءوز بەتىمىزشە اياققا تۇرا الاتىنىمىزعا زور ءۇمىت پەن سەنىم بولدى. ءقازىر ەكى ادامدى جۇمىسپەن قامتىپ وتىرمىن. بارلىق كوكونىستەر مەن جەمىستەردى سەنىمدى جەتكىزۋشىلەردەن ساتىپ الامىز. زامان اعىمىنا ساي بولۋ ءۇشىن ونلاين جەتكىزۋ قىزمەتىن ىسكە قوستىق. Instagram پاراقشاسى جانە WhatsApp ارقىلى تاپسىرىس قابىلداۋدى جولعا قويدىق، –دەپ اتاپ ءوتتى ول.
سونىمەن قاتار، ايمان تاپسىرىس بويىنشا اۆتورلىق سەبەتتەر مەن گۇلشوقتارىن جاسايدى. مۇنداي قىزمەت ءۇشارال ءۇشىن جاڭا كاسىپ ءتۇرى بولعان سوڭ، قالا تۇرعىندارى تاراپىنان سۇرانىس جوعارى.
بيىل كاسىپكەر ءوزىنىڭ اۆتورلىق سەبەتتەر مەن گۇل شوقتارىن ساتۋ بويىنشا جەكە ساۋدا نۇكتەسىن اشىپ، جاڭا دۇكەن اشۋدى جوسپارلاپ وتىر. سونداي-اق، جاقىن ماڭداعى قازاقستان، بەسكول، جاناما، ەڭبەكشى، جايپاق جانە ماي اۋىلدارىنا دا كوكونىستەر مەن جەمىستەر جەتكىزۋدى ۇيىمداستىرۋ ويدا بار.
