Qaraǵandy oblysynda politsiia beketindegi qyzdyń óliminen keiin ýchaskelik inspektor teris sebeptermen qyzmetinen bosatyldy. Ol qaiǵyly oqiǵa bolǵan kúni es-tússiz kúide marqumnyń janynan tabylǵan edi. Bul týraly Qaraǵandy oblystyq politsiia departamenti málimdedi, dep habarlaidy Dalanews.kz.
Oqiǵaǵa bailanysty tergeý amaldary jalǵasyp jatyr.
"Aýrýhanadan shyǵarylǵan ýchaskelik inspektor ishki ister organdarynan teris sebeptermen jumystan bosatyldy. Tergeýdiń múddesine bailanysty ózge aqparat jariia etilmeidi", – delingen resmi habarlamada.
Oblystyq densaýlyq saqtaý basqarmasynyń málimetinshe, er adam 23 qazan kúni aýrýhanadan shyqqan.
Eske salaiyq, buǵan deiin atalǵan oqiǵadan keiin birqatar basshy qyzmetterinen bosatylǵany týraly jazǵan edik.
Atap aitqanda:
- Mihailov politsiia bóliminiń bastyǵy Asqar Sádýaqasov;
- bólim bastyǵynyń qyzmet jónindegi orynbasary;
- ýchaskelik inspektorlardyń jumysyn qadaǵalaǵan bólim bastyǵynyń orynbasary qyzmetterinen bosatyldy.
Sonymen qatar Qaraǵandy qalalyq politsiia basqarmasyndaǵy birneshe jetekshige baqylaýdyń álsizdigi úshin sógis jariialanǵan.
Bul sheshim 30 qyrkúiekke qaraǵan túni bolǵan qaiǵyly oqiǵadan keiin qabyldanǵan. Aldyn ala derekterge sáikes, ýchaskelik inspektor 23 jastaǵy Almira esimdi qyzdy túngi kezekshilik kezinde politsiia beketine alyp kelgen. Buǵan deiin de ol qyzdy jumys ýaqyty kezinde alyp kelgeni belgili bolǵan.
Tańerteń aǵa ýchaskelik inspektor qyzdy divanda óli kúiinde, al 36 jastaǵy maior Daýren Dosovty jumys ústeliniń janynda es-tússiz kúide tapqan. Er adam aýrýhanaǵa jetkizilip, dárigerler onyń jaǵdaiyn turaqtandyrǵan.
Aldyn ala boljam boiynsha, olar belgisiz zattan ýlanǵan bolýy múmkin. Qazir tergeý jáne qyzmettik tekseris jalǵasyp jatyr.
