قاراعاندى وبلىسىندا پوليسيا بەكەتىندەگى قىزدىڭ ولىمىنەن كەيىن ۋچاسكەلىك ينسپەكتور تەرىس سەبەپتەرمەن قىزمەتىنەن بوساتىلدى. ول قايعىلى وقيعا بولعان كۇنى ەس-تۇسسىز كۇيدە مارقۇمنىڭ جانىنان تابىلعان ەدى. بۇل تۋرالى قاراعاندى وبلىستىق پوليسيا دەپارتامەنتى مالىمدەدى، دەپ حابارلايدى Dalanews.kz.
وقيعاعا بايلانىستى تەرگەۋ امالدارى جالعاسىپ جاتىر.
"اۋرۋحانادان شىعارىلعان ۋچاسكەلىك ينسپەكتور ىشكى ىستەر ورگاندارىنان تەرىس سەبەپتەرمەن جۇمىستان بوساتىلدى. تەرگەۋدىڭ مۇددەسىنە بايلانىستى وزگە اقپارات جاريا ەتىلمەيدى"، – دەلىنگەن رەسمي حابارلامادا.
وبلىستىق دەنساۋلىق ساقتاۋ باسقارماسىنىڭ مالىمەتىنشە، ەر ادام 23 قازان كۇنى اۋرۋحانادان شىققان.
ەسكە سالايىق، بۇعان دەيىن اتالعان وقيعادان كەيىن ءبىرقاتار باسشى قىزمەتتەرىنەن بوساتىلعانى تۋرالى جازعان ەدىك.
اتاپ ايتقاندا:
- ميحايلوۆ پوليسيا ءبولىمىنىڭ باستىعى اسقار ءسادۋاقاسوۆ؛
- ءبولىم باستىعىنىڭ قىزمەت جونىندەگى ورىنباسارى؛
- ۋچاسكەلىك ينسپەكتورلاردىڭ جۇمىسىن قاداعالاعان ءبولىم باستىعىنىڭ ورىنباسارى قىزمەتتەرىنەن بوساتىلدى.
سونىمەن قاتار قاراعاندى قالالىق پوليسيا باسقارماسىنداعى بىرنەشە جەتەكشىگە باقىلاۋدىڭ السىزدىگى ءۇشىن سوگىس جاريالانعان.
بۇل شەشىم 30 قىركۇيەككە قاراعان ءتۇنى بولعان قايعىلى وقيعادان كەيىن قابىلدانعان. الدىن الا دەرەكتەرگە سايكەس، ۋچاسكەلىك ينسپەكتور 23 جاستاعى الميرا ەسىمدى قىزدى تۇنگى كەزەكشىلىك كەزىندە پوليسيا بەكەتىنە الىپ كەلگەن. بۇعان دەيىن دە ول قىزدى جۇمىس ۋاقىتى كەزىندە الىپ كەلگەنى بەلگىلى بولعان.
تاڭەرتەڭ اعا ۋچاسكەلىك ينسپەكتور قىزدى ديۆاندا ءولى كۇيىندە، ال 36 جاستاعى مايور داۋرەن دوسوۆتى جۇمىس ۇستەلىنىڭ جانىندا ەس-تۇسسىز كۇيدە تاپقان. ەر ادام اۋرۋحاناعا جەتكىزىلىپ، دارىگەرلەر ونىڭ جاعدايىن تۇراقتاندىرعان.
الدىن الا بولجام بويىنشا، ولار بەلگىسىز زاتتان ۋلانعان بولۋى مۇمكىن. ءقازىر تەرگەۋ جانە قىزمەتتىك تەكسەرىس جالعاسىپ جاتىر.
