Qaraǵandy qalasynda politsiia men tótenshe qyzmet ókilderi der kezinde áreket etip, turǵyn úide oryn alýy múmkin aýyr oqiǵanyń aldyn aldy. Ákesimen janjaldasqan er adam óz-ózin jáne páterdi órtemek bolǵan. Oqiǵa ornyna kelgen politseiler ony óz degenine kóndire almaǵan soń arnaiy jasaq shaqyrýǵa májbúr bolǵan, dep habarlaidy Dalanews.kz.
"102" arnasyna jergilikti turǵyn habarlasyp, ulynyń ózin-ózi órteýge oqtalǵanyn jetkizgen. Aldyn ala málimet boiynsha, 40 jastaǵy er adam ákesimen bolǵan janjaldan keiin bes qabatty úidiń ekinshi qabatyndaǵy balkonǵa shyǵyp, qolyndaǵy benzin quiylǵan bótelkemen ózin de, páterdi de órteitinin málimdegen.
"Oqiǵa ornyna jedel jetken politsiia men qutqarýshylar aýmaqty qorshaýǵa alyp, podezdegi shamamen 40 adamdy qaýipsiz jerge evakýatsiialady. Alkogoldik mas kúiindegi azamat quqyq qorǵaý organdarynyń zańdy talaptaryna baǵynbai, balaǵat sózder aityp, kelissózderden bas tartqan. Politsiia departamenti bastyǵynyń orynbasary Jasqairat Qaiyrov ony berilýge 1 saǵattan astam úgittegenimen, odan nátije bolmady. Jaǵdaidyń ýshyǵýyna bailanysty oqiǵa orynyna jyldam qimyldaityn arnaiy jasaq qyzmetkerleri shaqyryldy. Júrgizilgen operatsiia barysynda arnai jasaq jaýyngeri úshinshi qabat balkony arqyly páterge kirip, órt qoiýǵa jol bermei, azamatty zalalsyzdandyrdy",- deidi QR IIM baspasóz qyzmeti.
Qazirgi tańda onyń psihonevrologiialyq dispanserge ornalastyrylǵany naqtylanady.
Buǵan deiin Qaraǵandy oblysynda áskeri tehnika júrgenin habarlaǵanbyz.
