قاراعاندى قالاسىندا پوليسيا مەن توتەنشە قىزمەت وكىلدەرى دەر كەزىندە ارەكەت ەتىپ، تۇرعىن ۇيدە ورىن الۋى مۇمكىن اۋىر وقيعانىڭ الدىن الدى. اكەسىمەن جانجالداسقان ەر ادام ءوز-وزىن جانە پاتەردى ورتەمەك بولعان. وقيعا ورنىنا كەلگەن پوليسەيلەر ونى ءوز دەگەنىنە كوندىرە الماعان سوڭ ارنايى جاساق شاقىرۋعا ءماجبۇر بولعان، دەپ حابارلايدى Dalanews.kz.
"102" ارناسىنا جەرگىلىكتى تۇرعىن حابارلاسىپ، ۇلىنىڭ ءوزىن-وزى ورتەۋگە وقتالعانىن جەتكىزگەن. الدىن الا مالىمەت بويىنشا، 40 جاستاعى ەر ادام اكەسىمەن بولعان جانجالدان كەيىن بەس قاباتتى ءۇيدىڭ ەكىنشى قاباتىنداعى بالكونعا شىعىپ، قولىنداعى بەنزين قۇيىلعان بوتەلكەمەن ءوزىن دە، پاتەردى دە ورتەيتىنىن مالىمدەگەن.
"وقيعا ورنىنا جەدەل جەتكەن پوليسيا مەن قۇتقارۋشىلار اۋماقتى قورشاۋعا الىپ، پودەزدەگى شامامەن 40 ادامدى ءقاۋىپسىز جەرگە ەۆاكۋاسيالادى. الكوگولدىك ماس كۇيىندەگى ازامات قۇقىق قورعاۋ ورگاندارىنىڭ زاڭدى تالاپتارىنا باعىنباي، بالاعات سوزدەر ايتىپ، كەلىسسوزدەردەن باس تارتقان. پوليسيا دەپارتامەنتى باستىعىنىڭ ورىنباسارى جاسقايرات قايىروۆ ونى بەرىلۋگە 1 ساعاتتان استام ۇگىتتەگەنىمەن، ودان ناتيجە بولمادى. جاعدايدىڭ ۋشىعۋىنا بايلانىستى وقيعا ورىنىنا جىلدام قيمىلدايتىن ارنايى جاساق قىزمەتكەرلەرى شاقىرىلدى. جۇرگىزىلگەن وپەراسيا بارىسىندا ارناي جاساق جاۋىنگەرى ءۇشىنشى قابات بالكونى ارقىلى پاتەرگە كىرىپ، ءورت قويۋعا جول بەرمەي، ازاماتتى زالالسىزداندىردى"،- دەيدى ق ر ءىىم باسپا ءسوز قىزمەتى.
قازىرگى تاڭدا ونىڭ پسيحونيەۆرولوگيالىق ديسپانسەرگە ورنالاستىرىلعانى ناقتىلانادى.
بۇعان دەيىن قاراعاندى وبلىسىندا اسكەري تەحنيكا جۇرگەنىن حابارلاعانبىز.
