Qaraǵandy oblysynda Qarqaraly aýdanyndaǵy dala órtin sóndirý barysynda órt sóndirýshi qaza tapty, dep habarlaıdy Dalanews.kz.

TJM málimetinshe, oqıǵa 6 qazanda bolǵan. № 24 órt sóndirý bóliminiń aǵa órt sóndirýshi-qutqarýshysy 1991 jyly týǵan Halı Haırat kóz jumdy. Serjant azamattyq qorǵaý organdarynda 2014 jyldan bastap jumys istegen.

"Oqıǵanyń mán-jaıy anyqtalýda. Sotqa deıingi tergeý bastaldy. Vedomstvonyń Apattar medısınasy ortalyǵynyń psıhologtary qaıtys bolǵan qyzmetkerdiń týystaryna qajetti psıhologıalyq kómek kórsetip jatyr", - delingen mınıstrlik taratqan aqparatta.

TJM qaza tapqan órt sóndirýshiniń otbasyna jan-jaqty kómek pen qoldaý kórsetedi.

Eske salaıyq, Qaraǵandy jáne Pavlodar oblystaryndaǵy alapat dala órti 3 myń gektar aýmaqty sharpydy. Órt negizinen Qaraǵandy oblysynyń Qoıandy aýylynda qurǵaq shóptiń tutanýynan bastalǵan, keıin jeldiń áserinen Baıanaýyl ulttyq parkiniń ormansyz aýmaǵyna taralǵan. Atalmysh jaǵdaı barysynda tórt adam zardap shekti, onyń ishinde úsh órt sóndirýshi jáne bir jergilikti turǵyn kúıik alyp, olar Qaraǵandy qalasyna tikushaqpen jetkizildi.

Órtti sóndirý úshin 56 tehnıka men 4 tikushaq jumyldyryldy. Sýdy Shalqarkól kólinen alyp, birneshe márte órt oshaqtaryna tókti. Jeltaý aýylynan 18 adam, onyń ishinde segiz bala evakýasıalandy    .