Qaraǵandy oblysynda blok-bekette turǵan polıseıler urlanǵan jylqylar tıelgen júk kóliginiń jolyn kesti, – dep habarlaıdy Dalanews.kz Polisia.kz. saıtyna silteme jasap.

9 qarasha kúni Qaraǵandy oblysy polısıa departamentine Astana qalalyq polısıa departamentinen urlanǵan jylqylar tıegen KamAZ júk kóligi Qaraǵandyǵa qaraı baǵyt alyp bara jatqany jóninde jedel aqparat kelip tústi. Temirtaý qalasyndaǵy blok-beketterdiń birinde tekseris júrgizip jatqan patrúldik polıseıler atalǵan kólikti toqtatty. Kólikti basqarǵan azamat Túrkistan oblysynyń 48 jastaǵy turǵyny bolǵan.

– Tekseris barysynda júrgizýshi 45 bas jylqyny Stepnogorsk qalasynyń turǵynynan 13,5 mıllıon teńgege satyp alǵanyn aıtty. Jylqylardyń naqty ıelerin anyqtaý maqsatynda krımınaldyq polısıa qyzmetkerleri jylqylardy beınejazbaǵa túsirip, ár óńirdegi sharýa qojalyqtarynyń chattaryna jibergen, – dep habarlady Qaraǵandy oblysy PD krımınaldyq polısıa basqarmasy bastyǵynyń orynbasary Meıirjan Slambekov.

Biraz ýaqyttan keıin Aqmola oblysynyń 54 jastaǵy turǵyny beınejazbadan ózine tıesili urlanǵan 27 jylqysyn tanyǵan. Atalǵan derek boıynsha qylmystyq is qozǵalyp, sotqa deıingi tergeý amaldary júrgizilip jatyr.