Qaraǵandy oblysy biyl naqty qurylys jumystary jáne óńirlik basqarýda tiimdiliktiń úlgisin kórsetti. Qazaqstan Qurylysshylar odaǵy jariialaǵan reitingke sáikes, aimaq respýblika boiynsha eń joǵary kórsetkishterge qol jetkizip, birneshe mańyzdy kriterii boiynsha úzdik dep tanyldy, dep habarlaidy Dalanews.kz Orda.kz-ke silteme jasap.
Qujatty elimizdiń iri salalyq uiymy (onyń quramynda 250 myńǵa jýyq jumys ornyn usynatyn 1500-ge jýyq ShOB kompaniia bar) qurastyrǵan. Bul jai ǵana analitika emes: baǵalaý naqty jobalarǵa, sandarǵa, merdigerlerdiń tájiribesine negizdelgen.
Sarapshylar óńirlerdiń qurylys salasyndaǵy tiimdiligin jobalardyń iske asýy, biýdjetti igerý sapasy, sheneýnikterdiń ashyqtyǵy, indýstriialyq jobalardyń oryndalýy jáne merdigerlerdiń tájiribesi syndy naqty kriteriiler arqyly baǵalaǵan.
"Biz tek ýádeler men qaǵazdardy ǵana emes, obektilerdiń naqty iske qosylýyn da baǵaladyq", – dedi QQO saraptama bóliminiń basshysy Ernur Isaqulov. Qaraǵandy oblysy josparlaýǵa ǵana emes, ony sońyna deiin jetkizýge de qabiletti ekenin kórsetti".
Qurylys naqty, nátije aiqyn
Reitingtiń basty ólshemi – qurylys qarqyny men memlekettik biýdjetti tiimdi igerý boldy. Bul rette Qaraǵandy oblysy indýstriialandyrý kartasy boiynsha josparlanǵan jobalardy ýaqytynda aiaqtap, naqty óndiristik nysandardy iske qosqan sanaýly aimaqtyń biri retinde tanyldy. Sarapshylardyń baǵalaýynsha, óńirde bólingen qarajat ýaqyt ozdyrmai igerilip, áleýmettik jáne infraqurylymdyq jobalar shynaiy qurylysqa ainalǵan.
Máselen, oblys aýmaǵynda zaýyttar, joldar jáne áleýmettik nysandar salyndy. Joba kúiinde qalyp qoimai, naqty iske asyrylǵan bul jumystar úshin Qaraǵandy oblysy +10 ball jinady. Iaǵni, óńir syzbadaǵy zaýytpen emes, qabyrǵasy qalanǵan, iske qosylǵan óndiris oryndarymen baǵalanyp otyr.
Sheneýnikterdiń jumysyna – ashyq baǵa
Reitingte sheneýnikterdiń ashyqtyǵy men adaldyǵy da negizgi kórsetkish retinde qaraldy. Qaraǵandy oblysy bul baǵytta da oń baǵalandy. Ákimdik turǵyndarmen bailanys ornatýda, máselelerdi sheshýde jáne sheshim qabyldaýda ashyqtyqty ustanyp otyr.
Aimaq ekonomikasy serpindi damyp keledi
Oblys ákimdigi aimaqqa bólingen qarjyny naqty jobalarǵa baǵyttap, olardyń nátijesin merziminen buryn kórsete aldy. Bul – óńirdiń basqarý sapasynyń, tiimdi josparlaý men oryndaýdyń aiǵaǵy.
Qurylysshylar odaǵy men sarapshylar qaýymdastyǵynyń aitýynsha, Qaraǵandy oblysy indýstriialandyrý kartasynda qozǵaltqysh kúshke ainalyp keledi. Bul – kómirli aimaqtyń óndiristik qýaty men áleýetin tiimdi paidalanýynyń naqty kórinisi.
