Raqymshylyq jasaý jaiyn bilikke biz birneshe ret usyndyq. Tergeý izoliatorynda jatqan 600-ge jýyq azamattyń árqaisysymen jeke-jeke sóilestik. Barlyǵy buryn sottalmaǵan, quqyq qorǵaý organdarynyń nazaryna oǵash qylyǵymen túspegen, qazaqtyń qarapaiym jigitteri. Adal kásip etip kelgender.
Endi 4 qańtardaǵy oqiǵadan, iaǵni, bir kúnniń ishinde olar qylmyskerge ainalyp shyqpaidy ǵoi.
Biz árbirinen «mynany nege istediń, qarýdy ne maqsatpen aldyń?» dep suradyq.
Hattama toltyrmaityn bolǵan soń bári ashyq sóiledi. Bári de ne úshin istegenin túsindire almady, «bilmeimin» dep jaýap qaitardy. Analiz jasap, usynystardy Prezident ákimshiligine joldadyq. Al qylmysty uiymdastyrǵandar, arandatqandarǵa kelgende, áńgime basqa. Tergeý oryndary kimniń kim ekenin anyqtap úlgerdi dep oilaimyn.
Bul raqymshylyqtyń ar jaǵynda birneshe ailyq tynymsyz eńbek tur.
Naqty keistardy alyp, ár adamnyń ómir tarihyn, minezdemesin zerttedik. Bári uqsas, aýylda týǵan azamattar. «Al alańǵa ne úshin shyqtyń?» dep suraǵanda, barlyǵy da «ádiletsizdik sebep boldy» dedi. Olardy búgingidei janarmaidyń nemese qanttyń qymbatshylyǵy ashyndyrmaǵan.
Shynyn aitqanda, kedeishilik taqymymyzdy qysyp bara jatqan joq. Basty sebep – ádiletsizdik bolǵan.
Buryn kei tustarda sottan, quqyq qorǵaý organdarynan kórgen ádiletsizdigi túrtken. 25 jastaǵy bir jigitten jaýap aldym.
«Sebep ádiletsizdik boldy» dep ashyq aitty. «Jas qoi, kimnen ádiletsizdik kórdi?» deseńiz, buryn jaqyndarynyń, dostarynyń kórgen ádiletsizdigi qozǵaǵan. Osynyń bári raqymshylyq jaily usynys aitýǵa túrtki boldy.
Zańger retinde saraptasaq, olardyń istegeni qylmys emes dep eshkim aita almaidy, ótirik emes. Bizdiń aitqymyz kelgeni – olardyń tabiǵaty qylmysker emes. Adam qylmysker bolý úshin sol jolda qalyptasady, mektepte tártipke baǵynbaidy, keiin sondai ortaǵa túsedi, al qańtar oqiǵasyna qatysqandar – taza adamdar. Endi oqiǵa úshin aiyptalyp, 3-5 jylǵa sottalǵan azamattar da bosap shyǵyp, sot úkimderi keri qaitarylady. Bul áli igi istiń basy dep bilem.
