Týrizm jáne sport ministrligi týr satyp alar kezde qandai qujattardy tekserý qajet ekenin túsindirdi, dep habarlaidy dalanews.kz.
Demalys kezinde azamattardyń qaýipsizdigi týristik qyzmetti rásimdeý barysynda zań talaptarynyń saqtalýyna tikelei bailanysty.
Týr satyp almas buryn týragentten týrdy satýdyń zańdylyǵyn jáne týristiń quqyqtyq qorǵalýyn rastaityn qujattar paketin suratyp, muqiiat teksergen jón. Eń aldymen, týragent qyzmetiniń bastalǵany týraly habarlamanyń bar ekenine kóz jetkizý qajet.
Týragenttik kompaniia memlekettik elektrondy tizilimge engizilýi tiis. Bul onyń resmi túrde qyzmet kórsetetinin rastaidy.
Týristik qyzmet kórsetý týraly shartqa qol qoiý — sapardy rásimdeýdegi negizgi kezeńderdiń biri. Qujatta baratyn el men sapar merzimi, týrdyń tolyq quny, tólem tártibi, týrdan bas tartý talaptary, taraptardyń jaýapkershiligi, sondai-aq qarajatty qaitarý sharttary naqty kórsetilýi qajet.
Qarjylyq qujattarǵa erekshe nazar aýdarǵan jón. Tólem jasaǵannan keiin mindetti túrde fiskaldyq chek talap etińiz. Qarajatty menedjerlerdiń jeke shottaryna aýdarmaǵan durys, sebebi tek resmi tólem qujaty mámileniń jasalǵanyn dáleldeidi.
Brondaý rastalyp, týr tolyq tólengennen keiin týragent týristke saparǵa qajetti qujattar paketin usynýǵa mindetti. Onyń quramyna qonaq úi, tamaqtaný jáne transfer týraly málimetter kórsetilgen vaýcher, áýe biletteri nemese marshrýttyq túbirtekter, saqtandyrý polisi jáne týristerdiń quqyqtaryn mindetti kepildendirý júiesi aiasyndaǵy qorǵanysty rastaityn týrkod kiredi.
Tótenshe jaǵdai týyndaǵan jaǵdaida týristerge Qazaqstan Respýblikasy azamattarynyń shyǵý týrizmi salasyndaǵy quqyqtaryna kepildik berý júiesiniń «Týristik Qamqor» jedel jelisine dereý habarlasý usynylady: +7 700 112 2 112.
