Keńes Odaǵynyń alǵashqy ǵaryshkeri Iýrii Gagarinniń qazasyna basqa ushaqtyń qaýipti manevri sebep bolýy múmkin. Kóp jyldar boiy qupiia saqtalǵan bul derekti keiin ǵaryshker Aleksei Leonov jariia etken, dep dalanews.kz tilshisi Malim.kz saityna silteme jasap habarlaidy.
Leonovtyń aitýynsha, resmi qorytyndyda Gagarin mingen ushaqtyń kúrt burylyp, shtoporǵa túsip, jerge qulaǵany kórsetilgen. Alaida ol bul nusqamen kelispei, apattyń naqty sebebi basqa bolǵanyn aitqan.
Onyń sózinshe, 1968 jylǵy 27 naýryzda Gagarin men nusqaýshy Vladimir Seregin jattyǵý ushýyn oryndap júrgen aimaqta ruqsatsyz Sý-15 ushaǵy paida bolǵan. Bul ushaqty basqarǵan pilot qaýipsizdik talaptaryn saqtamai, belgilengen biiktikten tómen túsken.
Leonovtyń málimetinshe, Sý-15 Gagarinniń ushaǵyna óte jaqyn qashyqtyqtan, shamamen 10-15 metr aralyqta bult ishinen ótip ketken. Sonyń saldarynan kúshti aýa tolqyny paida bolyp, Gagarin basqarǵan ushaq tepe-teńdigin joǵaltqan. Keiin ol shtoporǵa túsip, shamamen 750 shaqyrym/saǵ jyldamdyqpen jerge qulaǵan.
Ushaq ekipajy jaǵdaidy túzetýge tyrysyp, shtopordan shyǵýǵa áreket jasaǵanymen, úlgermegen. Nátijesinde Iýrii Gagarin men nusqaýshy Seregin qaza tapqan.
Leonov bul málimetter qupiia qujattar ashylǵannan keiin rastalǵanyn aityp, muny jai boljam emes, apattyń negizgi sebebi dep baǵalaǵan. Onyń pikirinshe, qaiǵyly jaǵdaiǵa ushý tártibiniń buzylýy men qaýipsizdik talaptarynyń saqtalmaýy áser etken.
Sondai-aq ol komissiia músheleri shyndyqty bilgenimen, ony uzaq ýaqyt boiy jariia etpegenin ókinishpen jetkizgen.
Al Sý-15 ushaǵyn basqarǵan ushqyshtyń aty-jónin Leonov atamaǵan. Onyń aitýynsha, bul derekti aitýǵa ruqsat berilgenimen, pilottyń jasy ulǵaiyp, densaýlyǵy nashar bolǵandyqtan, ol onyń esimin jariialamaýǵa ýáde bergen.
