راقىمشىلىق جاساۋ جايىن بيلىككە ءبىز بىرنەشە رەت ۇسىندىق. تەرگەۋ يزولياتورىندا جاتقان 600-گە جۋىق ازاماتتىڭ ارقايسىسىمەن جەكە-جەكە سويلەستىك. بارلىعى بۇرىن سوتتالماعان، قۇقىق قورعاۋ ورگاندارىنىڭ نازارىنا وعاش قىلىعىمەن تۇسپەگەن، قازاقتىڭ قاراپايىم جىگىتتەرى. ادال كاسىپ ەتىپ كەلگەندەر.
ەندى 4 قاڭتارداعى وقيعادان، ياعني، ءبىر كۇننىڭ ىشىندە ولار قىلمىسكەرگە اينالىپ شىقپايدى عوي.
ءبىز اربىرىنەن «مىنانى نەگە ىستەدىڭ، قارۋدى نە ماقساتپەن الدىڭ؟» دەپ سۇرادىق.
حاتتاما تولتىرمايتىن بولعان سوڭ ءبارى اشىق سويلەدى. ءبارى دە نە ءۇشىن ىستەگەنىن تۇسىندىرە المادى، «بىلمەيمىن» دەپ جاۋاپ قايتاردى. اناليز جاساپ، ۇسىنىستاردى پرەزيدەنت اكىمشىلىگىنە جولدادىق. ال قىلمىستى ۇيىمداستىرعاندار، ارانداتقاندارعا كەلگەندە، اڭگىمە باسقا. تەرگەۋ ورىندارى كىمنىڭ كىم ەكەنىن انىقتاپ ۇلگەردى دەپ ويلايمىن.
بۇل راقىمشىلىقتىڭ ار جاعىندا بىرنەشە ايلىق تىنىمسىز ەڭبەك تۇر.
ناقتى كەيستاردى الىپ، ءار ادامنىڭ ءومىر تاريحىن، مىنەزدەمەسىن زەرتتەدىك. ءبارى ۇقساس، اۋىلدا تۋعان ازاماتتار. «ال الاڭعا نە ءۇشىن شىقتىڭ؟» دەپ سۇراعاندا، بارلىعى دا «ادىلەتسىزدىك سەبەپ بولدى» دەدى. ولاردى بۇگىنگىدەي جانارمايدىڭ نەمەسە قانتتىڭ قىمباتشىلىعى اشىندىرماعان.
شىنىن ايتقاندا، كەدەيشىلىك تاقىمىمىزدى قىسىپ بارا جاتقان جوق. باستى سەبەپ – ادىلەتسىزدىك بولعان.
بۇرىن كەي تۇستاردا سوتتان، قۇقىق قورعاۋ ورگاندارىنان كورگەن ادىلەتسىزدىگى تۇرتكەن. 25 جاستاعى ءبىر جىگىتتەن جاۋاپ الدىم.
«سەبەپ ادىلەتسىزدىك بولدى» دەپ اشىق ايتتى. «جاس قوي، كىمنەن ادىلەتسىزدىك كوردى؟» دەسەڭىز، بۇرىن جاقىندارىنىڭ، دوستارىنىڭ كورگەن ادىلەتسىزدىگى قوزعاعان. وسىنىڭ ءبارى راقىمشىلىق جايلى ۇسىنىس ايتۋعا تۇرتكى بولدى.
زاڭگەر رەتىندە ساراپتاساق، ولاردىڭ ىستەگەنى قىلمىس ەمەس دەپ ەشكىم ايتا المايدى، وتىرىك ەمەس. ءبىزدىڭ ايتقىمىز كەلگەنى – ولاردىڭ تابيعاتى قىلمىسكەر ەمەس. ادام قىلمىسكەر بولۋ ءۇشىن سول جولدا قالىپتاسادى، مەكتەپتە تارتىپكە باعىنبايدى، كەيىن سونداي ورتاعا تۇسەدى، ال قاڭتار وقيعاسىنا قاتىسقاندار – تازا ادامدار. ەندى وقيعا ءۇشىن ايىپتالىپ، 3-5 جىلعا سوتتالعان ازاماتتار دا بوساپ شىعىپ، سوت ۇكىمدەرى كەرى قايتارىلادى. بۇل ءالى يگى ءىستىڭ باسى دەپ بىلەم.
