Etnikalyq qazaq Abdýl Halil Nadjibýlla Qazaqstanda 20 jyldan asa ýaqyt turǵan, biraq 2019 jyly azamattyǵy men biznesinen aiyrylǵan. Onyń aitýynsha, kásipornyn sol kezde Ulttyq qaýipsizdik komitetiniń tóraǵasy qyzmetin atqarǵan Kárim Másimovtiń ákesi Qajymqan Másimovke berýden bas tartqannan keiin osyndai jaǵdai bolǵan. Bul týraly QazTAG jazdy, - dep habarlaidy Dalanews.kz.
"2019 jyly ákemdi UQK-niń burynǵy tóraǵasy Kárim Másimovtiń ákesi Qajymqan Másimovpen kezdesýge shaqyrǵan. Astanadaǵy qonaqúilerdiń birinde meniń týystarymnyń kózinshe odan elevatordy berýdi talap etken. "Biznesińdi beresiń be, álde meniń ulymmen bailanysqyń kele me?" degen. Ákem bas tartqan, sol sátten bastap bári quldyrai bastady", - dedi zardap shekken kásipkerdiń uly Abdýl Halil Álijan.
Abdýl Halil Nadjibýlla 1993 jyly Aýǵanstannan qonys aýdarǵan, 2001 jyly Prezident jarlyǵymen Qazaqstan azamattyǵyn alǵan. Kókshetaýda táýligine 200 tonna un, 16,6 myń gektar jer jáne 200-den asa qyzmetkerdi qamtityn diirmen kesheni bar "Umai Jer" agroónerkásip holdingin qurǵan. Onyń aitýynsha, 2019 jyly Qajymqan Másimov onyń biznesine qyzyǵýshylyq tanytqan. Qandastardyń sózinshe, budan bas tartqannan keiin qylmystyq qýdalaýǵa ushyrap, eki jylǵa qamaýǵa alynǵan. 2022 jyly Joǵary sot úkimniń kúshin joiǵan, biraq biznes qurdymǵa ketken. Sondai-aq, kásipker azamattyǵynan aiyrylǵan.
Basylym bul jaǵdaiǵa bailanysty UQK tóraǵasyna saýal joldaǵan.
"UQK saýalda kórsetilgen adamǵa qatysty 2022 jyly Qylmystyq kodekstiń 245-baby (Uiymdarǵa salynatyn salyqty jáne (nemese) biýdjetke tólenetin basqa da mindetti tólemderdi tóleýden jaltarý) boiynsha sotaldy tergeý júrgizdi. 2023 jyly sot úkimimen ol memleketke keltirilgen zalaldy ótei otyryp, bes jylǵa bas bostandyǵynan aiyryldy", - dep jazylǵan jaýapta.
Basylym bul aqparatqa orai Qajymqan Másimovtiń ókilderinen pikir bildirýdi suraǵan.
