Asty tanymal jýrnalist, Alash áskeri týraly zertteýler jasaǵan Bolat Múrsálim júrgizdi. Asqa jinalǵan qaýym aldymen Qazaqstan Musylmandar dini basqarmasy bas múftii Erjan Qajy Malǵajar uly Maiemerovpen birge Alash qairatkerlerine, ǵasyr buryn Qazaqstannyń irgetasy Alash Orda avtonomiialyq memleketin qurǵan babalarymyzǵa quran baǵyshtady.
Qurannan soń Alashtanýshy ǵalym Mámbet Qoigeldi Alash intelligentsiiasyn ardaqtap sóz sóilep, baiandamasyn jasady. Ol óz sózinde «Alash qairatkerlerine arnaýly mýzei salynýy qajet, ony bilikke qarap otyrmai qalyń qazaq ózimiz jabylyp salýymyz kerek!» dep bastama kóterdi. Sondai-aq «Qamshy» portaly usynys etken «100 aǵash otyrǵyzý» ideiasyn osy jańa mýzeimen bailanystyryp, «100 aǵash jańa mýzei aýlasynda boi kóterýi tiis» dedi. Mámbet Qojabaiulymen birge sóz alǵan Prezidenttiń Parlamenttegi ókili Sabyr Qasymov ta quttyqtaýyn oqydy.
Almaty qalasy ákiminiń orynbasary Sultanbek Mákejanov sóz alyp, Alash Arystaryna arnalǵan astyń Alash Ordanyń 100 jyldyǵyn toilaýdyń bastamasy ekenin eske salyp, qutty bolsyn aitty.
Alash Qairatkerleriniń jarqyn ókili Muhtar Áýezovtiń uly, ǵalym Murat Áýezov te tebirene sóilep, ákesi Muhtar Omarhanulynyń aýzynan estigen estelikterimen bólisti.
Sonymen qosa «Aq orda» respýblikalyq qozǵalysy basshy Qairat Satybaldynyń arnaiy quttyqtaýyn ókil Qanat Musaǵulov oqydy.
Asqa Torǵai óńirinen, Shyǵys Qazaqstan oblysynan, Ońtústik Qazaqstan oblysynan resmi qonaqtar keldi. Ákimderiniń quttyqtaýyn ala kelgen ókilder Alash arystaryna arnap berilip jatqan asqa rizashylyǵyn bildirdi.
Sondai-aq sahnaǵa Qazaqstan Jazýshylar odaǵynyń basshysy orynbasary Maraltai Raiymbek shyǵyp, odaq basshysy Nurlan Orazalinnyń quttyqtaýyn jetkizdi. Al, astyń ótýine keńesshilik etken aqyn Almas Ahmetbek «Álihan monology» óleńin oqydy.
Aita keter bolsaq, sóz alǵandardyń barlyǵy Alashtyń toiyna bastama bolyp jatqan «Qamshy» portalyna, portaldyń jetekshisi Bilál Qýanyshqa alǵystaryn aitty. Sóz sońynda «Qamshy» portalynyń jetekshisi ári joba avtory Bilál Qýanysh «Ár qazaqtyń Alash arystarynyń aldynda qaryzdar ekenin, Alash qairatkerlerine taǵzym etý boryshy» ekenin aita kelip, asqa kelgen qonaqtarǵa alǵysyn bildirdi.
Asqa kelgen qonaqtar arnaýly tigilgen 7 kiiz úide dastarhanǵa jaiǵasqan sátte shaǵyn kontserttik baǵdarlama qoiyldy. «Turan toby», «Alash uly» toby, Bibigúl Qilymhan, siiaqty óner juldyzdary ánnen shashý shashty.
