Májiliste «Qazaqstan Respýblikasynyń keibir zańnamalyq aktilerine ekologiialyq máseleler boiynsha ózgerister men tolyqtyrýlar engizý týraly» zań jobasy birinshi oqylymda qaralýda, dep habarlaidy dalanews.kz.
Zań jobasy depýtattardyń bastamasymen ázirlenip, 2025 jylǵy 15 qańtarda Parlament Májilisine engizilgen. Qujattyń negizgi maqsaty – ekologiia salasyndaǵy zańnamany jetildirý.
Joba aiasynda ekologiiany tsifrlandyrý, kómirtekti ofsetterdi retteý, qaldyqtardy basqarý júiesin damytý, óndirýshiler men importtaýshylardyń keńeitilgen mindettemelerin iske asyrý, sondai-aq ekologiialyq baqylaý men ulttyq gidrometeorologiialyq qyzmetti jetildirý kózdelip otyr.
Sonymen qatar qujatta memlekettik ekologiialyq saraptama júrgizý jáne qoǵamdyq tyńdaýlar ótkizý tártibine qatysty naqtylaýshy túzetýler qarastyrylǵan.
Zań jobasyn talqylaý barysynda depýtattar birneshe baǵyt boiynsha qosymsha usynystar engizgen.
Atap aitqanda, investitsiialyq jobalar men kómirsýtekterdi barlaý jobalary úshin ekologiialyq ruqsattar alý merzimderin qysqartý usynylǵan. Bul norma teńizdegi kómirsýtekterdi barlaý jobalaryna qoldanylmaidy.
Sondai-aq kómirsýtekterdi barlaý, gazdy, munaidy jáne munai ónimderin magistraldyq qubyrlar arqyly tasymaldaý qyzmetin I sanattaǵy obektilerden II sanattaǵy obektilerge aýystyrý máselesi qaralǵan.
Depýtattar ýákiletti organnyń qaldyqtardy basqarý jáne qaitalama resýrstardy qaita óńdeý júiesin uiymdastyrýǵa qatysty quzyretin naqtylaýdy da usynǵan. Onyń ishinde jarnama, bilim berý jáne marketingtik is-sharalardy qarjylandyrý tártibin bekitý máseleleri bar.
Budan bólek, aýyldar men aýyldyq okrýgterdiń ákimdikterine kommýnaldyq qaldyqtardy jinaý, suryptaý jáne kómý oryndaryn uiymdastyrý quzyretin berý usynylyp otyr.
Zań jobasynda qaldyqtardy turaqty esepke alý nysanyn bekitý jáne ony toltyrý tártibin aiqyndaý máselesi de qamtylǵan.
Sonymen birge óndirýshilerdiń keńeitilgen mindettemeleri operatorynyń ókilettigin keńeitý usynylǵan. Atap aitqanda, memlekettik orman qory aýmaǵynda órtti erte anyqtaý júiesin engizý úshin materialdyq-tehnikalyq qamtamasyz etý baǵytyn bekitý qarastyrylǵan.
Qujatta klimattyq qarjylandyrý qaǵidalaryn jáne Parij kelisiminiń 6-baby aiasyndaǵy naryqtyq tetikterdi iske asyrý tártibin bekitý boiynsha ýákiletti organnyń quzyretin engizý usynylady.
Májilis komitetteri zań jobasy boiynsha oń qorytyndy bergen.
Ekologiia máseleleri jáne tabiǵat paidalaný komitetiniń tóraǵasy Edil Jańbyrshin komitet zań jobasyn birinshi oqylymda maquldaýǵa bolady dep esepteitinin málimdegen.
