Bir ai kóleminde túrli shyǵarmashylyq baiqaýlar, sheberlik sabaqtary, retro kontsertter men sporttyq saiystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar biylǵy merekeniń sánin kirgizetin bolady. Bul týraly Óńirlik kommýnikatsiialar qyzmeti alańynda ótken baspasóz-máslihatynda Taldyqorǵan qalasynyń ákimi Dastan Shaltabaev málimdedi.
Qala ákiminiń aitýynsha, biylǵy merekeniń erekshelikteri óte kóp. Bastysy – qalaǵa kórik beretin tarihi nysandardyń túbegeili jańartylýy. Qyrkúiektiń sońyna deiin I.Jansúgirov atyndaǵy mádeniet saraiy, ortalyq alańdaǵy sýburqaq, «Órken» sport kesheni tolyq jańalanyp, paidalanýǵa beriledi.
Al, 29-qyrkúiek kúni «Jastar» saiabaǵynda qala turǵyndaryna uzyndyǵy men eni 3 metrden bolatyn merekelik tort pen pitsa taratylady.
Ár aptanyń senbi kúnderi «Kúz tartýy» aýylsharýashylyq ónimderiniń jármeńkesi uiymdastyrylady. Jasyl jelekti qalamyzdyń tazalyǵy da árqashan nazarda.
Mereke boiy qala aýmaǵynda «Asar» uiymdastyrylyp, aiasynda tarihi-mádeni eskertkishter, saiabaqtar men shaǵyn demalys oryndary, sondai-aq aýlalar tazalanyp, qalpyna keltiriledi. Jastarǵa arnalǵan «Kóshbasshy-2018» festival-baiqaýy, «Jaidarman» oiyndary, «Densaýlyq» festivalderi ótip, úzdikter marapattalmaq.
– Qala kúni – taldyqorǵandyqtar taǵatsyzdana kútetin aitýly mereke. Biz bul merekege tolaiym tabystarmen kelip otyrmyz. Elbasy saiasatynyń arqasynda, Amandyq Ǵabbasulynyń qoldaýymen Jetisýdyń bas qalasy kúnnen kúnge jańaryp, jarqyrap keledi. Sonaý, Taldyqorǵan oblys ortalyǵy bolǵan 2001 jyldaǵy jaǵdaimen qazirgi qalany múldem salystyra almaimyz. Ol kezdegi kóshpen birge men de kelgen edim. Sodan beri Taldyqorǵan men úshin óte ystyq, ári súiikti qalaǵa ainaldy. Buiyrsa, aldaǵy jyldary Taldyqorǵannyń oblys ortalyǵy bolǵan mereitoilaryn keń kólemde atap ótetin bolamyz. Sol kúnderdi birge tamashalap, Taldyqorǵannyń jetistikterine atsalysyp júrýge barshańyzdy shaqyramyn, – dedi Dastan Turarbekuly.
