Atyraý oblysynda bir otbasynyń tórt múshesin óltirdi dep aiyptalǵan Sultan Sarsemalievke qatysty sot protsesinde taraptardyń jaryssózi bastaldy. Memlekettik aiyptaýshy sottan aiyptalýshyny kináli dep tanyp, oǵan ómir boiyna bas bostandyǵynan aiyrý jazasyn taǵaiyndaýdy surady.
Rezonans týdyrǵan is Atyraý oblysynyń qylmystyq ister jónindegi mamandandyrylǵan aýdanaralyq sotynda qaralyp jatyr. Sottalýshy Sultan Sarsemaliev burynǵy jubaiy Aqbaian Muqanǵalievanyń ata-anasyn, aǵasy men qaryndasyn óltirdi dep aiyptalýda. Qaiǵyly oqiǵa 2025 jyldyń sońynda Atyraý oblysy Jangeldin aýylynda bolǵan.
Sot jaryssózi kezinde prokýror Sarsemalievti Qylmystyq kodekstiń birneshe baby boiynsha kináli dep tanýdy surady. Memlekettik aiyptaýshynyń aitýynsha, sottalýshyǵa túpkilikti jaza retinde ómir boiyna bas bostandyǵynan aiyrý jazasy taǵaiyndalýy kerek.
«Qylmystyq kodekstiń 58-baby 4-bóligi negizinde Sarsemaliev Sultan Samigollaulyna túpkilikti jaza retinde ómir boiyna bas bostandyǵynan aiyrý jazasyn taǵaiyndaýdy suraimyn», – dedi prokýror sotta.
Aiyptaýshy tarap jazany tótenshe qaýipsizdik mekemesinde óteýdi usyndy.
Sultan Sarsemalievke birneshe aýyr aiyp taǵylǵan. Atap aitqanda, ol eki nemese odan da kóp adamdy óltirý, kinálige dármensiz kúide ekeni belgili adamdy óltirý, asa qatygezdikpen kisi óltirý, paidakúnemdik nietpen, qaraqshylyqpen nemese qorqytyp alýmen ushtasqan adam óltirý, sondai-aq birneshe ret jasalǵan kisi óltirý boiynsha aiyptalýda.
Budan bólek, oǵan iri mólsherde urlyq jasaý, iri mólsherde alaiaqtyq, mal urlyǵy jáne qujattardy zańsyz ielený, joiý, búldirý nemese jasyrý baptary boiynsha da aiyp taǵylǵan.
Prokýror sottan Sarsemalievten jábirlenýshilerge ótemaqy qoryna 30 ailyq eseptik kórsetkish, iaǵni 129 750 teńge óndirip alýdy surady. Sondai-aq 2 512 128 teńge kólemindegi protsessýaldyq shyǵyndardy óndirý jáne onyń qamaýda ustaý túrindegi bultartpaý sharasyn ózgerissiz qaldyrý usynyldy.
Sonymen qatar memlekettik aiyptaýshy jábirlenýshilerdiń materialdyq jáne moraldyq shyǵyndy óteý týraly azamattyq talaptaryn qanaǵattandyrýdy surady.
Al Sarsemalievtiń ózi Naýryz Muqanǵalievti qasaqana óltirý epizody boiynsha kinásin moiyndamaǵan.
Sot jaryssózi aiaqtalǵannan keiin aiyptalýshyǵa sońǵy sóz beriledi. Budan soń sot úkim shyǵarý úshin keńesý bólmesine ketedi.
